- Auglýsing -
- Ágúst Elí Björgvinsson, landsliðsmarkvörður, og samherjar hans í danska úrvalsdeildarliðinu Kolding unnu langþráðan sigur í gærkvöld er þeir lögðu Ribe-Esbjerg á heimavelli, 35:28, í dönsku úrvalsdeildinni í handknattleik. Ágúst Elí kom lítið við sögu í leiknum. Hann freistaði þess að verja tvö vítaköst en tókst ekki. Tim Winkler, hinn markvörður Kolding, stóð fyrir sínu. Kolding er í 13. sæti af 15 liðum með fimm stig eftir átta leiki og ljóst að liðið þarf fleiri sigurleiki á næstunni til þess að lyfta sér upp úr fallbaráttunni.
- Sara Dögg Hjaltadóttir var fjarri góðu gamni þegar lið hennar, Gjerpen, vann Levanger, 27:17, á heimavelli í norsku 1. deildinni á sunnudaginn. Gjerpen er efst í deildinni með 11 stig eftir sex leiki.
- Katrín Tinna Jensdóttir unglingalandsliðskona og félagar hennar í norska 1. deildarliðinu Volda unnu stórsigur á útivelli á Randesund, 30:20, á sunnudaginn. Katrín Tinna skoraði ekki mark en var sterk í vörninni. Halldór Stefán Haraldsson þjálfar liðið sem er í þriðja sæti með sjö stig að loknum fimm leikjum.
- Elías Már Halldórsson mátti horfa upp á lið sitt, Fredrikstad Bkl., tapa með eins marks mun á heimavelli fyrir Flint Tønsberg, 26:25, í norsku úrvalsdeildinni í handknattleik kvenna á sunnudaginn. Fredrikstad er í áttunda sæti með sex stig að loknum átta leikjum.
- Vegna bilunar í úrslitaþjónustu norska handknattleikssambandsins á sunnudagskvöld var ekki hægt að greina frá úrslitum á sunnudagskvöld eða í gærmorgun.
- Þýski markvörðurinn Clara Woltering hefur tekið fram keppnisskóna á nýjan leik eftir að hafa lagt skóna á hillina sumarið 2019 eftir glæsilegan feril. Woltering, sem er 38 ára gömul og á að baki 222 landsleiki, ætlar að hlaupa undir bagga hjá þýska meistaraliðinu Dortmund á næstunni meðan Yara ten Holte verður frá keppni vegna meiðsla. Holte meiddist í leik Dortmund og rússneska liðsins Rostov-Don í Meistaradeildinni á laugardaginn.
- Auglýsing -
