- Auglýsing -
- Ágúst Elí Björgvinsson, landsliðsmarkvörður, varði fjögur skot, þar af eitt vítakast, á þeim skamma tíma sem hann stóð í marki KIF Kolding undir lok leiksins við Skive í dönsku úrvalsdeildinni í gærkvöld. Þar á meðal varði Ágúst Elí síðasta markskot leikmanna Skive og tryggði liði sínu þar með annað stigið, 28:28. Kolding hefur ekki náð sér á flug í upphafsvikum tímabilsins og því er hvert stig kærkomið. Liðið er í 12. sæti af 15 með þrjú stig að loknum fimm leikjum. Skive-menn hafa komið á óvart. Þeir hafa fimm stig þegar þeir hafa lokið sex leikjum.
- Steinunn Hansdóttir skoraði eitt mark í tveimur tilraunum þegar lið hennar Skanderborg Håndbold tapaði fyrir Sikeborg-Voel, 30:24, í Silkeborg í gærkvöld. Skanderborg Håndbold er í níunda sæti af 14 liðum með fjögur stig í sex leikjum.
- Hannes Jón Jónsson og lærisveinar í Alpla Hard gerðu góða ferð til Tíról í gær þar sem þeir lögðu Handball Tirol, 25:21, í fimmtu umferð austurrísku 1. deildarinnar. Alpla Hard er áfram efst í deildinni með níu stig eftir fimm leik.
- Elvar Ásgeirsson skoraði þrisvar sinnum, þar af tvisvar úr vítakasti, á heimavelli í gærkvöld þegar hans Nancy tapaði fyrir St Raphaël, 32:27, í frönsku 1. deildinni í handknattleik. Nýliðar Nancy hafa átt erfitt uppdráttar í deildinni. Þeir hafa tvö stig að loknum fjórum leikjum.
- Birna Berg Haraldsdóttir, leikmaður ÍBV og landsliðsins, gekkst í fyrrdag undir sína þriðju aðgerð á hné á ferlinum þar sem krossband var lagað. Um mánuður er liðin síðan krossband slitnað hjá henni í kappleik. Birna Berg stefnir ótrauð á að mæta til leiks á handboltavellinum síðla á næsta hausti.
- Norski markvörðurinn Emily Stang Sando hefur óvænt samið við Horsens í Danmörku. Hún fékk samningi sínum við Bietigheim í Þýskalandi rift í vikunni. Sando hefur ekki leikið síðan í mars vegna hjartaveikinda. Jan Leslie, sem ráðinn var þjálfari Horsens, á dögunum segist óhikað semja við Sando enda séu veikindi Sando minniháttar.
- Auglýsing -
