- Auglýsing -
- Ágúst Ingi Óskarsson skoraði sjö mörk og Felix Már Kjartansson þrjú þegar Neistin vann StÍF, 33:32, í hörkuleik í Skálum, heimavelli StÍF, í færeysku úrvalsdeildinni í handknattleik á sunnudaginn. Staðan var jöfn að loknum fyrri hálfleik, 18:18. Bjartur Már Guðmundsson var ekki á meðal þeirra sem skoraði mark fyrir StÍF. Neistin er í næst neðsta sæti deildarinnar með 10 stig eftir 16 leiki. StÍF er í sæti fyrir ofan með einu stigi meira.
- Franska landsliðskonan Grace Zaadi hefur óskað eftir að verða leyst eins og fljótt og auðið verður undan samningi við rússneska meistaraliðinu Rostov-Don. Hermt er að umboðsmaður hennar eigi í viðræðum við CSM Búkarest en rúmenska félagið bar víurnar í Zaadi á síðasta ári. Þá ákvað hún að verða um kyrrt hjá rússneska meistaraliðinu.
- Ljóst er að danska landsliðskonan Kathrine Heindahl sem losnaði undan samningi við CSKA Moskvu í síðustu viku verður ekki gjaldgeng með félagi í Danmörku fyrr en á næsta keppnistímabili. Lokað er fyrir félagaskipti í Danmörku um þessar mundir. Heindahl hefur samið við Esbjerg.
- Slóvenska stórskyttan Ana Gros er laus undan samning við CSKA Moskvu. Óvíst er hvað tekur við hjá henni. Gros kom til rússneska félagsins á síðasta sumri og ætlaði að vera í tvö ár. Hún óskaði eftir að segja upp samningi sínum eftir innrás rússneska hersins í Úkraínu fyrir 12 dögum.
- Patrick Wiencek fyrirliði THW Kiel hefur ákveðið að gefa ekki oftar kost á sér í þýska landsliðið í handknattleik. Wiencek er 33 ára gamall og á 159 landsleiki að baki á 12 ára tímabili.
- Auglýsing -
