Molakaffi: Andrea, Ægir Hrafn, Óli Gúst og Aue-tríóið

Andrea Jacobsen handknattleikskona hjá Kristianstad í Svíþjóð. Mynd/Kristianstad Handboll
  • Andrea Jacobsen, landsliðskona í handknattleik, var í leikmannahópi sænska úrvalsdeildarliðsins Kristianstad í gær þegar liðið mætti Lugi á heimavelli og tapaði með tveggja marka mun, 21:19. Hún kom ekkert að öðru leyti við sögu í leiknum. Þetta var annar leikur Andreu í leikmannahópnum eftir að hún kom til baka úr meiðslum. Andrea sleit krossband fyrir ári. Hún sagði við handbolta.is í gær að vonir standi til að hún leiki með Kristianstad á næsta föstudag. Hennar markmið sé hinsvegar óbreytt. Að vera komin á fullt þegar úrslitakeppnin um sænska meistaratitilinn hefst síðar í þessum nýbyrjaða mánuði. 
  • Ægir Hrafn Jónsson lék ekki með Fram gegn KA í Olísdeildinni í handknattleik. Hann var sprautaður í aðra öxlina á dögunum og verður að taka því með ró næstu daga af þeim sökum. 
  • Ólafur Gústafsson hefur lítið leikið með KA upp á síðkastið. Eftir því sem næst verður komist eru eymsli í liðþófa í hné að gera Ólafi gramt í geði um þessar mundir. Óvíst er hvenær hann mætir á leikvöllinn aftur. 
  • Arnar Birkir Hálfdánsson skoraði eitt mark í þremur skotum og átti tvær stoðsendingar þegar EHV Aue gerði jafntefli við Ferndorf á heimavelli í þýsku 2.deildinni í handknattleik í gær.  Sveinbjörn Pétursson varði 6 skot í marki Aue sem lagði sig út á 20% hlutfallsmarkvörslu. EHV Aue, sem Rúnar Sigtryggsson þjálfar er í sjöunda sæti deildarinnar með 20 stig eftir 17 leiki. 
- Auglýsing -

Nýjustu fréttir

- Auglýsing -