Molakaffi: Andrea, Sagosen, Weinhold, Abalo, Guigou, Genty, Hausleitner

Andrea Jacobsen handknattleikskona hjá Kristianstad í Svíþjóð. Mynd/Kristianstad Handboll
  • Andrea Jacobsen skoraði eitt mark og átti fjórar stoðsendingar þegar lið hennar Kristianstad vann Kungsälavs Hk, 30:21, í sænsku úrvalsdeildinni í handknattleik kvenna í gærkvöld. Leikið var í Kristianstad.  Kristianstad situr í fimmta sæti deildarinnar með fjögur stig að loknum þremur leikjum. 
  • Handknattleiksmennirnir Sander Sagosen og Steffen Weinhold léku ekki með Kiel gegn Lemgo á sunnudaginn og óvíst er hvenær þeir verða klárir í slaginn. Báðir eru þeir í einangrun eftir að hafa greinst smitaðir af kórónuveirunni. Þeir eins og aðrir leikmenn THW Kiel er fullbólusettir. Engu að síður hafa þeir krækt sér í veiruna. 
  • Luc Abalo, Michaël Guigou og Yann Genty eru ekki í franska landsliðinu sem Guillaume Gille þjálfari liðs Ólympíumeistaranna hefur valið til æfinga fyrir þátttöku í fjögurra liða móti í Noregi í fyrstu viku nóvembermánaðar. Þremenningarnir ákváðu að hætta með landsliðnu eftir sigur þess á Ólympíuleikunum í Tókíó í sumar. 
  • Framlengdur hefur verið ráðningasamningur við Martin Hausleitner framkvæmdastjóra Handknattleikssambands Evrópu, EHF. Hausleitner hefur sinnt starfinu frá 2017 þegar hann tók við af Michael Wiederer sem kjörinn var forseti EHF. Áður hafði Hausleitner verið framkvæmdastjóri austurríska handknattleikssambandsins frá 1997. Ef ekki kemur babb í bátinn hjá Hausleitner verður hann hjá EHF til ársins 2025.
- Auglýsing -

Nýjustu fréttir

- Auglýsing -