Molakaffi: Appelgren frá út árið, Sagosen og Hansen

Mikael Appelgren markvörður er væntanlegur í slaginn á næstu dögum eftir langa fjarveru. Mynd/EPA
  • Þýska handknattleiksliðið Rhein-Neckar Löwen, sem Alexander Petersson og Ýmir Örn Gíslason leika með, verður án annars markvarðar síns,  Mikael Appelgren, það sem eftir lifir árs. Appelgren er meiddur á öxl og þarf að gangast undir aðgerð til að fá bót meina sinna. Á meðan mun mikið mæða Andreas Palicka.  Appelgren og Palicka hafa ekki aðeins verið markvarðapar RN-Löwen síðustu árin heldur einnig verið markvarðapar sænska landsliðsins. 
  • Meiðsl norska handknattleiksmannsins Sander Sagosen eru ekki eins alvarleg og óttast var í fyrstu. Félag hans, THW Kiel, sagði í yfirlýsingu í gær að reiknað væri með að Sagosen gæti byrjað að spila með liðinu á ný eftir þrjár vikur gengi endurhæfing að óskum. THW Kiel leikur sex leiki í þýsku deildinni og í Meistaradeild Evrópu á næstu þremur vikum meðan Sagosen verður fjarverandi. 
  • Danski handknattleiksmaðurinn Mikkel Hansen er nú orðinn leikjahæsti leikmaður í sögu franska liðsins PSG. Hann lék á sunnudag sinn 334 leik fyrir liðið. Hansen kom til PSG sumarið 2012 eftir að AG Köbenhavn varð gjaldþrota. Hansen náði öðrum áfanga í síðustu viku þegar hann skoraði sitt 2000. mark fyrir liðið gegn Heshkov Brest í Meistaradeildarleik.
- Auglýsing -

Nýjustu fréttir

- Auglýsing -