Molakaffi: Aron, Arnór, Sveinn, Andrea, Harpa, Bjartur

Aron Pálmarsson, leikamaður Aalborg. Mynd/EPA
  • Aron Pálmarsson skoraði fjögur mörk í átta skotum og átti eina stoðsendingu þegar Aalborg vann Holstebro í átta liða úrslitum dönsku bikarkeppninnar í gærkvöld, 30:20, á heimavelli Holstebro. Simon Gade markvörður Aalborg fór hamförum í markinu og var með 55% markvörslu. Aalborg er þar með komið í undanúrslit keppninnar eins og GOG, Bjerringbro/Silkeborg og ríkjandi bikarmeistarar Mors-Thy. Úrslitahelgi bikarkeppninnar þar sem leikið verður til undanúrslita og úrslita fer fram í mars. Arnór Atlason er sem fyrr aðstoðarþjálfari Aalborg.
  • Sveinn Jóhannsson skoraði eitt mark fyrir SönderjyksE gerði jafntefli við Fredericia, 26:26, á heimavelli í afar jöfnum leik í dönsku úrvalsdeildinni í gærkvöld. SönderjyskE situr í áttunda sæti en liðin í kring eiga leik til góða.
     

  • Andrea Jacobsen skoraði fimm mörk í átta skotum og átti tvær stoðsendingar þegar lið hennar, Kristianstad, tapaði með sex marka mun fyrir Sävehof í Partille í gær, 32:26. Kristianstad er í sjöunda sæti með sex stig eftir sjö leiki. Sävehof er efst með 12 stig að loknum sjö leikjum einnig. Meistarar Skuru hafa einnig 12 stig en hafa aðeins lokið sex leikjum.
  • Harpa Rut Jónsdóttir og samherjar hennar í LK Zug, meistaraliðinu í Sviss, unnu Herzogenbuchsee, 38:30, á heimavelli í gærkvöld og komust þar með í efsta sæti deildarinnar, alltént í bili. LK Zug er með 12 stig eftir sjö leiki en SPONO Eagles og Brühl hafa 11 stig hvort en eiga leik til góða á Hörpu og félaga. Akureyringurinn skoraði ekki mark í leiknum í gær.
  • Bjartur Már Guðmundsson skoraði tvö mörk fyrir StÍF þegar liðið steinlá fyrir H71, 35:18, í færeysku úrvalsdeildinni í handknattleik í gærkvöld. Leikið var í Hoyvikurhöllinni. StÍF er neðst í deildinni með fimm stig eftir átta leiki. H71 situr í öðru sæti með átta stig, er tveimur á eftir KÍF frá Kollafirði sem trónir á toppnum.
- Auglýsing -

Nýjustu fréttir

- Auglýsing -