- Auglýsing -
- Aron Pálmarsson skoraði sex mörk og átti fjórar stoðsendingar þegar lið hans Aalborg Håndbold vann Fredericia, 32:30, í dönsku úrvalsdeildinni í handknattleik í gær. Arnór Atlason er aðstoðarþjálfari Aalborg sem er í öðru sæti deildarinnar með 23 stig eftir 14 leiki og er fjórum stigum á eftir GOG.
- Ólafur Andrés Guðmundsson og samherjar í Montpellier unnu Chartres, 32:21, í frönsku 1. deildinni í handknattleik í gærkvöld á heimavelli. Montpellier er í níunda sæti deildarinnar með 13 stig eftir 13 leiki og er níu stigum á eftir PSG sem trónir á toppnum.
- Daníel Freyr Andrésson varði sex skot, 22%, þann tíma sem hann stóð á milli stanganna í marki Guif í gær þegar liðið tapaði naumlega fyrir IFK Ystads HK, 30:29, í sænsku úrvalsdeildinni í handknattleik í Ystad. Aron Dagur Pálsson skoraði tvö mörk fyrir Guif sem er í áttunda sæti sænsku úrvalsdeildarinnar.
- Andy Schmid hefur samið við HC Kriens-Luzern í heimalandi sínu en hann flytur til Sviss á næsta sumri eftir að hafa leikið með Rhein-Neckar Löwen í Þýskalandi í 12 ár.
- Sænski landsliðsmaðurinn Jonathan Carlsbogard hefur ákveðið að nýta sér uppsagnarákvæði í samningi sínum við þýsku bikarmeistarana Lemgo og kveðja félagið næsta sumar. Sennilegt er talið að hann gangi til liðs við annað félag í þýsku 1. deildinni.
- Petar Nenadic og Patrik Ligetvári hafa skrifað undir nýja samninga við ungverska liðið Veszprém. Nenadic til 2023 og sá síðarnefndi til 2024.
- Auglýsing -
