Molakaffi: Aue-liðar, Færeyjar, Juul og Buric

Arnar Birkir Hálfdánsson kveður EHV Aue í lok keppnistímabilsins eftir tveggja ára veru. Mynd/EHV Aue
  • Arnar Birkir Hálfdánsson skoraði þrjú mörk í þremur skotum þegar lið hans EHV Aue tapaði í gær fyrir N-Lübbecke, 33:25, í þýsku 2. deildinni í handknattleik. Með sigrinum komst N-Lübbecke upp í annað sæti deildarinnar. Liðið er nú stigi á undan lærisveinum Guðjóns Vals Sigurðssonar í Gummersbach og stigi á eftir Hamburg sem situr í toppsætinu. Gummersbach og Hamburg eiga leik til góða. 
  • Sveinbjörn Pétursson varði sjö skot í marki Aue á þeim nærri 50 mínútum sem hann stóð í marki liðsins. Þetta gerði rúmlega 21% hlutfallsmarkvörslu. Rúnar Sigtryggsson er þjálfari EHV Aue-liðsins sem situr í áttunda sæti deildarinnar af 19 liðum.
  • STíF frá Skálum í Færeyjum heldur áfram að koma á óvart í úrslitakeppninni um færeyska meistaratitilinn í handknattleik kvenna. Liðið vann ríkjandi meistara H71 í undanúrslitum og í gær vann liðið fyrsta úrslitaleikinn við Neistan, 23:22. Leikið var á heimavelli Neista-kvenna í Þórshöfn. 
  • VÍF frá Vestmanna tók forystuna í úrslitarimmunni við H71 um meistaratitilinn í handknattleik karla í Færeyjum í gær með fimm marka sigri á heimavelli, 26:21.
  • Hornamaður dönsku meistaranna Aalborg Håndbold, Buster Juul, hefur skrifað undir nýjan eins árs samning eftir því sem Nordjyske greinir frá. Juul hefur leikið ríflega 300 leiki yfir Álaborgarliðið síðan hann kom í raðir þess fyrir átta árum. 
  • Staðfest hefur verið að bosníski línumaðurinn Senjamin Buric kemur til danska úrvalsdeildarliðsins Skjern í sumar. Hann leysir Norðmanninn Bjarte Myrhol  og Danann Jonas Tidemann af hólmi. Buric leikur nú með RK Zagreb. Buric hefur m.a. áður verið hjá Nantes í Frakklandi og Gorenje í Slóveníu.
- Auglýsing -

Nýjustu fréttir

- Auglýsing -