Molakaffi: Berta Rut, meira af Polman, Vori dustar rykið

Berta Rut Harðardóttir, Haukum. Mynd/Egill Bjarni Friðjónsson
  • Berta Rut Harðardóttir leikmaður Hauka fer ekki í leikbann en hún var útilokuð eftir að 20 mínútur voru liðnar af leik KA/Þórs og Hauka í Olísdeild kvenna á sunnudaginn. Aganefnd HSÍ  úrskurðaði í máli Bertu Rutar í gær  og var það niðurstaðan að ekki skuli aðhafst frekar vegna málsins en vakin er þó athygli á stighækkandi áhrifum útilokana.
  • Danska úrvalsdeildarliðið Esbjerg greindi frá því í fréttatilkynningu í gærmorgun að Estavana Polman hafi verið leyst undan samningi við félagið. Hollenska handknattleikskonan hefur leikið með Esbjerg frá 2013 og hefur verið hluti af afar sigursælu liði Esbjerg. Alls lék Polman 240 leiki með Esbjerg liðinu og skoraði í þeim 1.270 mörk. Hún er markahæsti leikmaðurinn í sögu félagsins. Í vetur hefur verið grunnt á því góða á milli Polman og Jesper Jensen þjálfara. 
  • Polman var burðarás hollenska landsliðsins þegar það varð heimsmeistari í árslok 2019. Sumarið eftir sleit hún krossband í hné rétt áður en keppnistímabilið hófst. Síðan hefur ferill hennar verið þyrnum stráður. Óvíst er hvað tekur við hjá Polman en hún ætlar sér ekki að leggja skóna á hilluna eftir því sem næst verður komist. Í samtali við TV2 í Danmörku sagði hún að næsta skref væri að ljúka málum sínum hjá Esbjerg en hún er með samning við félagið fram á mitt næsta ár. 
  • Króatinn Igor Vori hefur tekið skóna af hillunni og blásið af þeim rykið. Um leið hefur hann samið við Füchse Berlin um að leika með liðinu út keppnistímabilið. Meiðsli hrjá línumenn Berlínarliðsins um þessar mundir. Vori er 41 árs gamall og lék á sínum tíma 246 landsleiki fyrir Króata. Hann þekkir vel til í þýskum handknattleik eftir að hafa leikið með HSV Hamburg frá 2009 til 2013. 
- Auglýsing -

Nýjustu fréttir

- Auglýsing -