Molakaffi: Birkir Snær, Kovacs, Csürgo, Mittun, Wallinius, FH

Mynd/Hafliði Breiðfjörð
  • Birkir Snær Steinsson, einn leikmanna U18 ára landsliðsins í handknattleiks karla sem nú tekur þátt í Evrópumeistaramótinu í handknattleik í Svartfjallalandi, kom ekki til móts við félaga sínu í landsliðinu fyrr en í gærmorgun. Brottför hans frá Íslandi tafðist vegna endurnýjunar vegabréfs og varð hann eftir á Íslandi þegar hópurinn fór af landi brott á þriðjudaginn. Slóst hann í för til Svartfjallands með foreldrum sínum daginn eftir þegar nýtt vegabréf var afhent.
  • Birkir Snær mætti á hótel landsliðsins í Podgorica klukkan átta í gærmorgun, lagði sig þá um stund en var mættur í slaginn með félögum sínum upp úr hádegi í gær og tók þátt í sigurleiknum á Pólverjum, 38:25, í fyrstu umferð mótsins. Birkir Snær skoraði eitt mark síðla leiksins. Hann verður klár í slaginn á ný eins og aðrir leikmenn íslenska landsliðsins þegar flautað verður til leiks við Ungverja í annarri umferð riðlakeppni EM kl. 14 í dag. Handbolti.is verður með leikinn í textalýsingu.


  • Tveir leikmanna ungverska landsliðsins, Tamas Kovacs og Kirstof Csürgo skoruðu 27 af 35 mörkum liðsins, í þriggja marka sigri á Þjóðverjum á EM U18 ára landsliða á EM í gær, 35:32.
  • Færeyingurinn Oli Mittun, sem fór á kostum með U20 ára landsliðinu á Evrópumótinu í Porto, fyrir um mánuði, skoraði 17 mörk fyrir U18 ára landslið Færeyinga þegar það tapaði naumlega fyrir Svíum, 32:29, í fyrsta umferð í gær. Mittun skoraði mörk sín í 22 skottilraunum.


  • Sænski landsliðsmaðurinn Karl Wallinius er sterklega orðaður við vistaskipti yfir til Kiel frá Montpellier. Kieler Nachrichten segir samkvæmt heimildum að Wallinius gæti verið orðinn leikmaður þýsku bikarmeistaranna um eða upp úr helginni.
  • Kvennalið FH í handknattleik kom í gær til Lloret de mar á Spáni þar sem dvalið verður í æfingabúðum næstu vikuna.
a>
- Auglýsing -

Nýjustu fréttir

- Auglýsing -