- Auglýsing -
- Bjarni Ófeigur Valdimarsson skoraði fimm mörk og átti eina stoðsendingu auk þess að vera fastur fyrir í vörninni þegar lið hans, IFK Skövde vann Kristianstad með fimm marka mun, 33:28, í annarri viðureign liðanna í undanúrslitum um sænska meistaratitilinn í handknattleik í gærkvöld. Leikið var í Kristianstad. Skövde hefur tvo vinninga í einvíginu en Kristianstad engan en þrjá vinninga þarf til þess að vinna rimmuna og leika til úrslita um sænska meistaratitilinn. Næsti leikur verður í Skövde á fimmtudagskvöld.
- Tomislav Jagurinovski sem lék með Þór Akureyri í Grill66-deildinni í vetur hefur samið við Tinex Proleta í heimalandi sínu, Norður Makedóníu. Tinex Proleta er í næst efstu deild en hefur sett stefnuna á að fara upp á næsta keppnistímabili.
- Danski landsliðsmaðurinn Mads Mensah Larsen hefur framlengt samning sinn við Flensburg til ársins 2026. Mensah hafði verið orðaður við dönsku meistarana Aalborg Håndbold en ljóst er að ekkert verður af flutningi hans heim á næstunni.
- Danski línumaðurinn Magnus Saugstrup hefur skrifað undir nýjan samning við Magdeburg í Þýskalandi. Nýi samningurinn gildir til ársins 2026. Saugstrup kom til þýska liðsins fyrir ári frá danska meistaraliðinu Aalborg Håndbold.
- Samherjar Saugstrup, Gísli Þorgeir Kristjánsson og Ómar Ingi Magnússon skrifuðu í vetur undir langtímasamninga við Magdeburg.
- Auglýsing -
