- Auglýsing -
- Björn Viðar Björnsson markvörður tók við þakklætisvotti frá handknattleiksdeild ÍBV í hálfleik í gær á síðari leik ÍBV og Holon HC í 1. umferð Evrópukeppninnar. Björn Viðar ákvað í sumar að láta staðar numið eftir að hafa staðið vaktina í marki ÍBV um nokkurra ára skeið eins og handbolti.is sagði frá á dögunum.
- Berta Rut Harðardóttir fyrrverandi leikmaður Hauka fór vel af stað með danska 1. deildarliðinu Holstebro í gær þegar liðið lék sinn fyrsta leik. Berta Rut gekk til liðs við Holstebro í sumar. Hún skoraði fjögur mörk í fimm marka sigri Holstebro á Ejstrup/Hærvejen, 29:24, á útivelli.
- Norska úrvalsdeildarliðið Volda tapað naumlega fyrir Fana á útivelli í gær, 28:27, í annarri umferð deildarkeppninnar. Dana Björg Guðmundsdóttir skoraði þrjú af mörkum Volda, Katrín Tinna Jensdóttir skoraði eitt mark. Rakel Sara Elvarsdóttir náði sér ekki á strik og skoraði ekki úr þeim þremur skotum sem hún átti á mark Fana. Halldór Stefán Haraldsson er þjálfari Volda og Hilmar Guðlaugsson er honum til halds og trausts. Volda hefur tvö stig eftir tvo leiki en liðið er nýliði í deildinni.
- Orri Freyr Þorkelsson skoraði fjögur mörk og var einu sinni vísað af leikvelli þegar Elverum vann Fjellhammer, 30:25, á heimavelli í gær en liðin leika í norsku úrvalsdeildinni. Elverum hefur fjögur stig eftir þrjár umferðir.
- Ólafur Andrés Guðmundsson lék afar vel fyrir Amicitia Zürich og skoraði m.a. átta mörk þegar liðið tapaði fyrir HC Kriens-Luzern, 39:35, í þriðju umferð svissnesku A-deildarinnar í gær. Andy Schmid fór hamförum með liði HC Kriens-Luzern. Hann skoraði 17 mörk í 21 skoti. Schmid flutti heim í sumar eftir áratug í með Rhein-Neckar Löwen í Þýskalandi.
- Halldór Jóhann Sigfússon og liðsmenn Holstebro fögnuðu sínum fyrsta sigri í dönsku úrvalsdeildinni í gær. Holstebro vann Skanderborg Aarhus á heimavelli, 28:27.
- Hafþór Már Vignisson skoraði eitt mark þegar lið hans Empor Rostock tapaði á heimavelli fyrir Hüttenberg, 29:24, í þýsku 2. deildinni í gær. Sveinn Andri Sveinsson var ekki í leikmannahópi Rostockliðsins. Rostock er án sigurs í deildinni eftir tvo leiki.
- Auglýsing -
