Molakaffi: Dæmdu þriðja leikinn, Bertelsen hættir, Christensen og Christensen, forseti í framboð, Biegler

Bjarki Bóasson sýnir Ema Kirova, markverði Norður Makedóníu rauða spjaldið í leik Norður Makedóníu og Spánar í gær. Mynd/EHF
  • Handknattleiksdómararnir Bjarki Bóasson og Gunnar Óli Gústafsson dæmdu í gær viðureign Norður Makedóníu og Spánar í B-deild Evrópumóts kvenna 17 ára og yngri í Klaipeda í Litáen. Þetta var þriðji leikurinn sem þeir félagar dæma í keppninni. Þeir dæma leiki í A-riðli en íslenska landsliðið á sæti í B-riðli. 
  • Hinn dugmikli formaður danska handknattleikssambandisns undanfarin áratug, Per Bertelsen, gefur ekki kost á sér til endurkjörs á þingi danska handknattleikssambandsins í lok þessa mánaðar. Í formannstíð Bertelsen hefur fjárhagur sambandsins tekið stakkaskiptum til hins betra auk þess sem árangur innan vallar hefur verið afar góður, ekki síst hjá karlalandsliði. Einnig hefur Bertelsen verið óhræddur að taka að sér erfið verkefni og má þar m.a. nefnda Evrópumeistaramót kvennalandsliða í desember á síðasta ári. 
  • Morten Stig Christensen, framkvæmdastjóri danska handknattleikssambandsins til síðustu 14  ára og fyrrverandi landsliðsmaður, hefur einn gefið kost á sér í embætti formanns, enn sem komið er. Nái Christensen kjöri segir hann lausu starfi framkvæmdastjóra.
  • Norski markvörðurinn Espen Christensen hefur ákveðið að gefa ekki oftar kost á sér í landsliðið. Hann ætlar að láta sér nægja að leika með félagsliðum þau ár sem hann á eftir af ferlinum. 
  • Andreas Michelmann, forseti þýska handknattleikssambandsins, gefur kost á sér í kjöri eins af varaforsetum Alþjóða handknattleikssambandsins, IHF, á þingi þess í Antalya í Tyrklandi í byrjun nóvember.  Frakkinn Joel Delplanque er í embættinu núna en mun ekki gefa kost á sér til endurkjörs. 
  • Hinn þrautreyndi þýski handknattleiksþjálfari Michael Biegler hefur verið ráðinn til Handknattleikssambands Úkraínu. Hann á að stokka upp spilin innan sambandsins og koma skipulagi á málefni karlalandsliðanna, eftir því sem fram kemur í tilkynningu frá sambandinu. Biegler hefur víðtæka og langa reynslu af þjálfun. Hann hefur auk margra félagslið þjálfað karlalandslið Póllands og kvennalandslið Þýskalands.
- Auglýsing -

Nýjustu fréttir

- Auglýsing -