- Auglýsing -
- Kristján Örn Kristjánsson, Donni, skoraði tvö mörk fyrir PAUC þegar liðið tapaði á heimavelli fyrir Saint-Raphaël, 28:26, í frönsku 1. deildinni í handknattleik í gær. PAUC situr í fjórða sæti deildarinnar með 22 stig eftir 15 leiki, er tveimur stigum og leik á eftir Nantes sem er í þriðja sæti.
- Bjarki Már Elísson skoraði sex mörk, þar af fimm úr vítaköstum þegar Lemgo vann Ludwigshafen, 25:24, á útivelli í þýsku 1. deildinni í handknattleik í gær. Bjarki Már skoraði sigurmarkið þegar hálf mínúta var til leiksloka. Lemgo er í áttunda sæti deildarinnar.
- Ýmir Örn Gíslason var í sigurliði Rhein-Neckar Löwen í gær þegar liðið sótti heim og lagði Leipzig, 33:26. Hann náði hinsvegar ekki að skora en var að vanda aðsópsmikilli í vörn liðsins. Rhein-Neckar Löwen er í fjórða sæti deildarinnar en er samt aðeins tveimur stigum á eftir Flensburg sem er efst.
- Lærisveinar Aðalsteins Eyjólfssonar í Kadetten gerðu jafntefli við Suhr Araau, 27:27, á útivelli í efstu deild svissnesku karladeildarinnar í gær. Kadetten er í öðru sæti með 36 stig eftir 23 leiki og er tveimur stigum á eftir Pfadi Winterhur sem trónir á toppnum.
- Viktor Gísli Hallgrímsson og félagar í GOG endurheimtu efsta sæti dönsku úrvalsdeildarinnar í gær með sjö marka sigri á Fredericia, 37:30, á heimavelli. Viktor Gísli átti stórleik, varði 19 skot, þar af tvö víti, og var með liðlega 40% hlutfallsmarkvörslu. Tvær umferðir eru eftir af dönsku úrvalsdeildinni.
- Sigvaldi Björn Guðjónsson skoraði fimm mörk fyrir Vive Kielce í gær þegar liðið vann Tarnov, 31:20, á útivelli í pólsku úrvalsdeildinni í handknattleik. Liðin mætast á ný innan tíðar í úrslitaleik pólsku bikarkeppninnar í handknattleik. Vive Kielce hefur yfirburði í deildinni sem fyrr. Liðið hefur unnið alla 17 leiki sína til þessa en það á níu leiki eftir. Engin úrslitakeppni verður í Póllandi í vor vegna veirunnar.
- Auglýsing -
