Molakaffi: Donni, Orri, Ágúst, Felix, Arnar, Bjartur, Elías, Katrín, Halldór, Hilmar, Aðalsteinn

Kristján Örn Kristjánsson, Donni, leikmaður PAUC í Frakklandi. Mynd/PAUC
  • Kristján Örn Kristjánsson, Donni, og félagar hans í PAUC unnu Montpellier 29:28, í æsispennandi leik í frönsku 1. deildinni í handknattleik í gær en leikið var í Montpellier. Donni skoraði þrjú mörk í sex skotum. Ólafur Andrés Guðmundsson var ekki í leikmannahópi Montpellier að þessu sinni. PAUC er í þriðja sæti deildarinnar með 13 stig eftir níu leiki eins og Nantes. PSG er efst sem fyrr með 18 stig eftir níu viðureignir. Montpellier er á hinn bóginn í áttunda sæti með níu stig. Liðinu hefur ekki vegnað sem best í frönsku deildinni en þeim mun betur í Meistaradeild Evrópu sem fer af stað í vikunni eftir hlé.
  • Orri Freyr Þorkelsson skoraði fjögur mörk þegar Elverum vann Bækkelaget, 32:29, á útivelli í norsku úrvalsdeldinni í handknattleik í gær. Orri Freyr átti til viðbótar eina stoðsendingu. Elverum er efst í deildinni með 20 stig eftir 10 leiki og er fimm stigum á undan Arendal sem er í öðru sæti.

  • Ágúst Ingi Óskarsson og Felix Már Kjartansson skoruðu fimm mörk hvor fyrir Neistan þegar liði vann StÍF, 36:30, á heimavelli í færeysku úrvalsdeildinni í handknattleik í gær. Lið Neistans, sem Arnar Gunnarsson þjálfar, var sex mörkum yfir að loknum fyrri hálfleik, 19:13. Bjartur Már Guðmundsson skoraði ekki fyrir StÍF að þessu sinni.
  • Neistin er kominn upp í fjórða sæti með 8 stig að loknum 8 leikjum í deildinni og fór stigi upp fyrir Team Klaksvik með þessum sigri en Klaksvíkurliðið tapaði fyrir KÍF frá Kollafirði í gær, 22:21. Bjartur Már og félagar í StÍF reka lestina í deildinni með fimm stig.
  • Fredrikstad Bkl., liðið sem Elías Már Halldórsson þjálfar, tapaði með 10 marka mun fyrir Byåsen, 30:20, á útivelli í norsku úrvalsdeild kvenna í handknattleik í gær. Fredrikstad situr í sjöunda sæti með 10 stig að loknum 11 leikjum.

  • Birta Rún Grétarsdóttir var ekki í leikmannahópi Oppsal þegar liðið gerði jafntefli við Follo, 28:28 í norsku úrvalsdeildinni í gær. Oppsal er í níu sæti af 14 liðum deildarinnar.
  • Íslendingaliðið Volda er á siglingu í 1. deild kvenna í Noregi. Í gær vann Volda öruggan sigur á Ålgård, 30:27, á heimavelli í hinni glæsilegu og nýju keppnishöll, Volda Campus Sparebank1 Arena. Katrín Tinna Jensdóttir skoraði ekki mark fyrir Volda. Halldór Stefán Haraldsson er aðalþjálfari liðsins eins og undanfarin ár og Hilmar Guðlaugsson er honum til aðstoðar eins og áður. Volda er í öðru sæti deildarinnar með 13 stig eftir átta leiki, er tveimur stigum á eftir Gjerpen Skien sem Sara Dögg Hjaltadóttir leikur með.

  • Aðalsteinn Eyjólfsson og lærisveinar hans í Kadetten Schaffhausen kjöldrógu liðsmenn RTV Basel í gær í svissnesku A-deildinni í handknattleik á heimavelli. Lokatölur voru 25:14 en fimm marka munur var að loknum fyrri hálfleik, 11:6. Kadetten Schaffhausen er með yfirburðastöðu í deildinni, hefur 22 stig að loknum 11 leikjum og er sex stigum á undan Zürich til viðbótar við að eiga leik til góða.
- Auglýsing -

Nýjustu fréttir

- Auglýsing -