- Auglýsing -

Molakaffi: Elías Már, Green, Karabatic, syrtir í álinn, smitaður Litái

Elías Már Halldórsson þjálfari Fredrikstad. Mynd/Fredrikstad Bkl.
  • Norska úrvalsdeildarliðið Fredrikstad Bkl., sem Elías Már Halldórsson þjálfar, vann Molde örugglega á útivelli í gær, 32:23. Svo öruggur sigur kom nokkuð á óvart þar sem Molde situr í fimmta sæti deildarinnar en Fredrikstad Bkl var í níunda sæti deildarinnar áður en flautað var til leiks. Liðið færðist upp um tvö sæti með sigrinum. 
  • Danski landsliðsmarkvörðurinn Jannick Green fer ekki með danska landsliðinu á Evrópumeistaramótið þegar leikmenn fara til Ungverjalands nú í vikubyrjun. Green greindist smitaður af covid 3. janúar og í gær reyndist hann enn vera jákvæður og verður áfram í einangrun frá félögum sínum. Fyrsti leikur Dana á EM verður á fimmtudaginn í Debrecen gegn Svartfellingum. Ekki er útilokað að Green bætist í hópinn þegar á mótið líður.
  • Nikola Karabatic lék sinn 325. leik fyrir franska landsliðið í gær gegn Þýskalandi í Wetzlar sem greint er frá hér. Þetta var jafnframt í fyrsta sinn sem Karabatic er fyrirliði franska landsliðsins. Hljóp hann í skarð fyrirliðans Valentin Porte sem er í einangrun vegna covidsmits. 
  • Enn syrtir í álinn hjá serbneska landsliðinu í handknattleik karla í undirbúningi þess fyrir EM í handknattleik karla. Fleiri smit voru greind innan leikmannahópsins í gær. Þar með eru níu leikmenn í einangrun vegna covid. Huggun harmi gegn er að þjálfarinn Toni Gerona og markvörðurinn Vladimir Cupara fengu grænt ljós í gær um að mega yfirgefa sóttkví. 
  • Einn leikmanna landsliðs Litáen, Mykolas Lapiniauskas, greindist með covid í gær. Litáar hættu við komu hingað til lands fyrir helgina til tveggja vináttuleikja vegna ótta við smit.
- Auglýsing -
- Auglýsing -

Nýjustu fréttir

- Auglýsing -