- Auglýsing -
- Elías Már Halldórsson og leikmenn hans í norska úrvalsdeildarliðinu Fredrikstad Bkl. tapaði fyrir Romerike Ravens, 27:25, á heimavelli í gær. Þar með höfðu liðin sætaskipti. Romerike Ravens fór í áttunda sætið en Fredrikstad Bkl féll um eitt sæti, í það níunda.
- Evrópumeistarar Spánar höfðu unnið 18 leiki í röð og gert eitt jafntefli gegn Noregi í gær þegar liðin mættust í næst síðustu umferð milliriðils 2 á Evrópumótinu í handknattleik karla í Bratislava í gær. Loksins tókst Norðmönnum að snúa við blaðinu í gær og vinna, 27:23. Norska landsliðið er efst í riðlinum með sex stig eins og Svíþjóð og Spánn.
- Svíþjóð vann Þýskaland, 25:21. Þar með er alveg úti um vonir þýska landsliðsins á sæti í undanúrslitum eða að ná í leikinn um fimmta sætið. Eins og kunnugt er hefur kórónuveiran herjað grimmilega á þýska landsliðið síðan mótið hófst fyrir nærri hálfum mánuði. Þetta er þriðja Evrópumótið í röð þar sem Þjóðverjar komast ekki í undanúrslit. Fyrir sex árum urðu þeir Evrópumeistarar undir stjórn Dags Sigurðssonar.
- Pólland leikur við Spán í lokaumferðinni á morgun auk þess sem Noregur og Svíþjóð eigast við. Spennandi lokaumferð er framundan í millriðli tvö á EM.
- Fyrir helgina komst upp að falin myndavél hafði verið um í skeið í búningsklefa þýska kvennaliðsins TuS Metzingen sem leikur í efstu deild þar í landi. Leikmaður liðsins mun hafa rekist á upptökubúnaðinn. Þýska blaðið Bild greindi frá þessu fyrst og sagði að einn hafi verið handtekinn og liggi undir grun um að eiga búnaðinn eða að hafa komið honum fyrir. Í yfirlýsingu frá félaginu segjast forráðamenn þess vera miður sín vegna málsins.
- Auglýsing -
