- Auglýsing -
- Elín Jóna Þorsteinsdóttir stóð fyrir sínu og varði 14 skot, 35% markvörslu, þegar lið hennar Ringköbing tapaði fyrir Holstebro. 27:25, á heimavelli í dönsku úrvalsdeildinn í handknattleik kvenna í gær. Liðin eru í tveimur neðstu sætum deildarinnar, Ringköbing er næst neðst með átta stig en Holstebro rekur lestina en sigurinn liðsins gær var sá fyrsti í deildinni á keppnistímabilinu.
- Danska landsliðskonan Line Haugsted hefur samið við ungverska stórliðið Györ frá og með næsta keppnistímabili. Haugsted kveður þar með Viborg í heimalandi sínu eftir sex ára veru. Samningur hennar við Györ er til tveggja ára.
- Aðeins tveir þjálfarar sigurliða EM frá upphafi eru ekki fæddir eða eru ríkisborgarar í landi sigurliðsins sem þeir þjálfa og stýra til sigurs á mótinu. Dagur Sigurðsson var fyrstur til þess 2016 þegar hann var þjálfari þýska landsliðsins sem varð Evrópumeistari og í gær stýrði Norðmaðurinn Glenn Solberg sænska landsliðinu til sigurs. Annars hefur þjálfari sigurliðsins alltaf verið frá sama landi og sigurliðið.
- Talið er víst að Glenn Solberg sé langefstur á nafnalista norska handknattleikssambandsins yfir óskaþjálfara fyrir karlalandsliðið ef Christian Berge ákveður að segja starfi sínu lausu á næstu dögum. Sambandið hefur óskað eftir að Berge svari því afdráttarlaust fyrir 18. febrúar hvort hann ætli að standa við starfsssamning sinn eða ekki. Berge er með samning til ársins 2025. Hann er sagður áhugasamur að taka við þjálfun Kolstad sem til stendur að gera að einu besta félagsliði Evrópu innan nokkurra ára.
- Franska handknattleiksstjarnan Nikola Karabatic lék í gær í sautjánda sinn um verðlaun með franska landsliðinu. Í fyrsta skipti þá tókst honum ekki að skora í leik um verðlaun á stórmóti.
- Jim Gottfridsson varði í gær þriðji handknattleiksmaðurinn til þess að vera valinn í annað sinn mikilvægasti leikmaður Evrópumótsins í handknattleik. Gottfridsson hreppti einnig hnossið árið 2018 þegar Svíar hlutu silfurverðlaun á mótinu eftir tap fyrir Spáni í úrslitaleik, 29:23. Hinir eru Ivano Balic 2004 og 2006 og Nikola Karabatic 2008 og 2014.
- Auglýsing -
