Molakaffi: Elín Jóna, Satchwell og fimm aðrir, Porte, Golla, Sandell

Elín Jóna Þorsteinsdóttir landsliðsmarkvörður og markvörður Ringkøbing Håndbold. Mynd/Ringkøbing Håndbold
  • Elín Jóna Þorsteinsdóttir og samherjar í Ringkøbing Håndbold töpuðu fyrir Ajax København, 30:21, í upphafsleik 10. umferðar dönsku úrvalsdeildarinnar í handknattleik í gær. Jesper Holmris þjálfari liðsins skellti skuldinni á varnarleikinn sem hann sagði hafa verið hreina hörmung. Elín Jóna var í marki Ringkøbing talsverðan hluta leiksins en náði sér ekki á strik og þar hafði slakur varnarleikur sitt að segja. Hún varð 5 skot, 21% markvarsla. Ringkøbing situr í 11. sæti af 14 liðum deildarinnar með 6 stig.
  • Sex handknattleiksmenn sem leika með félagsliðum hér á landi eru í 30 manna æfingahópi færeyska landsliðsins sem æfir saman þessa vikuna í Þórshöfn. Er þar um að ræða KA-mennina Nicholas Satchwell, Allan Norðberg og Pætur Mikkjalsson, Dánjal Ragnarsson hjá ÍBV auk Framaranna Vilhelm Poulsen og Rógva Dal Christiansen.  Færeyska landsliðið mætir Lúxemborg, Lettlandi og Ítalíu í forkeppni HM um miðjan janúar. 
  • Valentin Porte er nýskipaður fyrirliði franska landsliðsins í handknattleik karla. Hann tekur við af Michaël Guigou sem verið hefur fyrirliði um langt árabil. Guigou  ákvað að hætta að leika með franska landsliðinu eftir sigur þess á Ólympíuleikunum í sumar. Porte er 31 árs gamall og á 151 landsleik að baki. Frakkar mæta Norðmönnum, Dönum og Hollendingum á fjögurra liða móti í Noregi í vikulokin. 
  • Hinn 23 ára gamli línumaður Flensburg, Johannes Golla, hefur verið settur fyrirliði þýska landsliðsins í handknattleik karla. Golla verður 24 ára gamall á föstudaginn
  • Sænski landsliðsmaðurinn Lukas Sandell hefur framlengt dvöl sína hjá Danmerkurmeisturum Aalborg Håndbold fram á mitt árið 2023.
- Auglýsing -

Nýjustu fréttir

- Auglýsing -