Molakaffi: Elvar, Arnar, Elliði, Hákon, Arnar, Sandra, Orri, Óskar, Elías, Birta, Katrín, Ólafur

Elvar Örn Jónsson í æfingaleik í sumar. Mynd/MT Melsungen
  • Elvar Örn Jónsson skoraði tvö mörk í fimm skotum og átti tvær stoðsendingar þegar lið hans MT Melsungen vann Leipzig, 26:22, á útivelli í þýsku 1. deildinni í handknattleik í gær. Arnar Freyr Arnarsson og Alexander Petersson tóku einnig þátt í leiknum með Melsungen-liðinu en skoruðu ekki. Arnari Frey var vísað einu sinni af leikvelli. Melsungen er í áttunda sæti með 12 stig eftir 11 leiki, tíu stigum á eftir efsta liðinu SC Magdeburg.
  • Elliði Snær Viðarsson og Hákon Daði Styrmisson skoruðu fjögur mörk hvor fyrir Gummersbach í gær er liðið vann EHV Aue, 37:23, á heimavelli í þýsku 2. deildinni í handknattleik. Arnar Birkir Hálfdánsson skoraði eitt mark fyrir Aue og átti eina stoðsendingu. Áki Egilsnes skoraði fjögur mörk. Sveinbjörn Pétursson náði sér ekki á strik á þeim 22 mínútum sem hann stóð í marki Aue-liðsins. Gummersbach er sem fyrr efst í deildinni. Liðið hefur nú 20 stig eftir 12 leiki og er tveimur stigum á undan Nordhorn. EHV Aue situr í 15. sæti af 20 liðum.

  • Sandra Erlingsdóttir skoraði þrjú mörk, þar af eitt úr vítakasti, í sex marka sigri liðs hennar, EH Aalborg á AGF í dönsku 1. deildinni í handknattleik í gær, 26:20. EHF Aalborg er í 5. sæti með 12 stig eftir 10 leiki, sex stigum á eftir SönderjyskE sem er efst.
  • Orri Freyr Þorkelsson var markahæstur hjá Noregsmeisturum Elverum er þeir lögð Nærbö, 35:26, í norsku úrvalsdeildinni í gær. Orri Freyr skoraði sjö mörk, ekkert úr vítakasti. Elverum er lang efst í deildinni með 22 stig að loknum 11 leikjum, er sex stigum á undan Drammen sem er í öðru sæti.
  • Óskar Ólafsson skoraði eitt mark þegar Drammen vann Runar í uppgjöri um annað sætið, 26:21, í Sanderfjord í gær. Viktor Petersen Norberg komst ekki á blað hjá Drammen að þessu sinni.
  • Elías Már Halldórsson, þjálfari Fredrikstad Bkl, varð að horfa upp á lið sitt tapa á heimavelli fyrir Fana í gær, 27:25, í norsku úrvalsdeildinni. Fredrikstad er í 8. sæti af 14 liðum.
  • Birta Rúna Grétarsdóttir var ekki í leikmannahópi Oppsal sem tapaði á heimavelli fyrir Byåsen, 28:25. Oppsal er í 10. sæti norsku úrvalsdeildarinnar.
  • Katrín Tinna Jensdóttir og stöllur hennar í Volda gerðu góða ferð til Fjellahammer í gær og unnu með sex marka mun, 29:23. Volda heldur þar með öðru sæti deildarinnar með 15 stig stig eftir níu leiki. Gjerpen er efst með 17 stig. Katrín Tinna skoraði ekki í leiknum í gær en var föst fyrir í vörninni og var einu sinni vísað af leikvelli. Halldór Stefán Haraldsson er þjálfari Volda og Hilmar Guðlaugsson er honum til aðstoðar.
  • Ólafur Andrés Guðmundsson skoraði eitt mark og átti tvö markskot þegar lið hans Montpellier tapaði fyrir Chambéry í frönsku 1. deildinni á útivelli í gær. Montpellier er í 8. sæti af 16 liðum deildarinnar með 9 stig eftir 10 leiki.
- Auglýsing -

Nýjustu fréttir

- Auglýsing -