- Auglýsing -
- Elvar Ásgeirsson skoraði fimm mörk í sjö skotum þegar lið hans Nancy tapaði fyrir Limoges, 29:27, á heimavelli í frönsku 1. deildinni í handknattleik í gærkvöld. Nancy situr enn í neðsta sæti deildarinnar með fjögur stig og er fremur að syrta í álinn.
- Grétar Ari Guðjónsson stóð fyrir sínu og varði 13 skot, 36%, í gærkvöld fyrir Nice í frönsku 2. deildinni í handknattleik. Það dugði hinsvegar liðinu ekki sem tapaði fyrir Pontault, 26:20, á heimavelli. Nice er í áttunda sæti af 16 liðum deildarinnar.
- Það gengur ekki sem best hjá Elínu Jónu Þorsteinsdóttur og samherjum í Ringköbing Håndbold. Í gær töpuðu þær fyrir Silkeborg-Voel, 32:28, í dönsku úrvalsdeildinni í handknattleik. Elín Jóna varði 10 skot, 24%, fyrir Ringköbingliðið sem er í næst neðsta sæti deildarinnar.
- Góður endasprettur leikmanna EH Aalborg kom ekki í veg fyrir að liðið tapaði með tveggja marka mun fyrir SönderjyskE, 24:22, í dönsku 1. deildinni í handknattleik í gærkvöld. Sandra Erlingsdóttir skoraði tvö af mörkum EH Aalborg. EH Aalborg er í fjórða sæti deildarinnar með 18 stig eftir 15 leiki. SönderjyskE er efst með 30 stig.
- Daníel Freyr Andrésson varði 9 skot, 32%, þegar lið hans Guif frá Eskilstuna tapaði fyrir Redbergslid, 30:27, í Gautaborg í gær í viðureign liðanna í sænsku úrvalsdeildinni í handknattleik karla. Aron Dagur Pálsson skoraði tvö mörk í sex skotum og átti fjórar stoðsendingar fyrir Guif-liðinu.
- Andreas Palicka, markvörður sænska landsliðsins og nýkrýndur Evrópumeistari í handknattleik stóð stærstan hluta leiksins í marki Redbergslid. Hann náði sér alls ekki á strik og varði aðeins tvö af 24 skotum sem á mark hans barst.
- Örn Vésteinsson Östenberg skoraði fjögur mörk fyrir lið sitt, Tønsberg Nøtterøy, þegar það tapaði fyrir Arendal, 40:29, á útivelli í norsku úrvalsdeildinni í handknattleik í gærkvöld. Tønsberg Nøtterøy situr í 11. sæti af 14 liðum deildarinnar með 10 stig eftir 17 leiki.
- Auglýsing -