Molakaffi: Fannar Þór, Hákon Daði, Arnar, Anna, Arnór, Gísli, Mikalonis, Sigrún

Fannar Þór Friðgeirsson. Mynd/ÍBV
  • Fannar Þór Friðgeirsson lék sinn síðasta leik fyrir ÍBV á föstudaginn þegar liðið vann Val í undanúrslitum Íslandsmótsins í handknattleik karla í Origohöllinni. Sigurinn nægði ekki til þess að fleyta ÍBV í úrslit Íslandsmótsins. Fannar kom til ÍBV fyrir þremur árum eftir að hafa leikið í Þýskalandi um árabil m.a. með Emsdetten, Wetzlar, Eintracht Hagen og Grosswallstadt. Einnig lék Fannar Þór með Val um árabil áður en hann flutti til Þýskalands. Fannar lék um skeið með íslenska landsliðinu og var m.a. í HM-hópnum 2013.
  • Fannar Þór greindi frá því í vetur að hann ætlaði að flytja norður til Akureyrar í sumar og venda þar kvæði sínu í kross og taka við rekstri Bakarísins við brúna.
  • Annar Eyjamaður lék kveðjuleik sinn fyrir ÍBV á föstudaginn, Hákon Daði Styrmisson. Hann flytur til Þýskalands í sumar og leikur með Gummersbach næstu tvö ár. Fyrir hjá Gummersbach er þegar fyrrverandi samherji Hákons Daða úr ÍBV, Elliði Snær Viðarsson.
  • Eftir því sem næst verður komist leikur línumaðurinn Arnar Máni Rúnarsson ekki með Stjörnunni á næsta keppnistímabili. Arnar Máni gekk til liðs við Stjörnuna á síðasta sumri en náði sér ekki á strik og skoraði 13 mörk í 14 leikjum í Olísdeildinni. 
  • Hermt er að Anna Lára Davíðsdóttir leikmaður Gróttu leiki með Haukum í Olísdeild kvenna á næsta keppnistímabili. Anna Lára var í hópi bestu leikmanna Gróttu í Grill 66-deildinni á leiktíðinni. Hún er systir landsliðskonunnar Evu Bjarkar sem leikur með Stjörnunni og Þorgeirs Bjarka sem er liðsmaður Vals.
  • Arnór Freyr Stefánsson markvörður Aftureldingar mun vera á leið í Stjörnuna eftir þrjú ár hjá Aftureldingu. Alltént var hann kvaddur í lokahófi Aftureldingar á föstudagskvöldið ásamt Þorsteini Gauti Hjálmarssyni en nokkuð er síðan Fram greindi frá að sá síðarnefndi kæmi heim í Safamýri í sumar. 
  • Karolis Stropus og Ihor Kopyshynskyi, sem léku með Þór Akureyri í haust, vetur og vor í Olísdeildinni, er án samning eins og kom fram á handbolti.is á dögunum. Þeir munu hafa verið að leita hófana eftir að komast að hjá félögum á höfuðborgarsvæðinu. Ekkert mun enn hafa hlaupið á snærið hjá þeim félögum ennþá, eftir því sem næst verður komist. 
  • Gísli Jörgen Gíslason sem lék með Þór á síðari hluta keppnistímabilsins er kominn í raðir FH á nýjan leik en hann var lánaður til Þórsara.
  • Sömu sögu er að segja um Egidijus Mikalonis. Hann er kominn í raðir ÍR á nýjan leik eftir lánsdvöl hjá Víkingi frá upphafi keppnistímabilsins.
  • Línukonan Sigrún Ása Ásgrímsdóttir er aftur orðin liðsmaður Stjörnunnar eftir að hafa verið lánuð til Vals á miðju keppnistímabili. 
a>
- Auglýsing -

Nýjustu fréttir

- Auglýsing -