- Auglýsing -
- Fimm Íslendingar standa þeim til boða sem vilja hafa áhrif á valið í úrvalslið Evrópumótsins í handknattleik karla en kosið er í gegnum EHF-appið sem einfalt er að finna og hlaða niður í síma. Íslendingarnir fimm eru: Viktor Gísli Hallgrímsson, Bjarki Már Elísson, Ómar Ingi Magnússon, Sigvaldi Björn Guðjónsson og Ýmir Örn Gíslason. Leikmönnum er skipt niður í átta stöður á vellinum og er hægt að velja á milli sex í hverri stöðu. Nánari upplýsingar er að finna hér.
- Spánverjarnir Andreu Marin og Ignacio Garcia dæma viðureign Íslands og Noregs um 5. sæti á Evrópumeistaramótinu í dag. Þeir hafa áður dæmt tvo leiki hjá íslenska liðinu í mótinu og staðið sig prýðilega.
- Dómurum hefur verið raðað niður á þá leiki sem eftir eru í mótinu. Þjóðverjarnir Robert Schulze og Tobias Tönnies dæma úrslitaleik EM á sunnudag. Þeir hafa einnig dæmt í það minnsta tvo leiki hjá íslenska landsliðinu í mótinu.
- Hvít-rússneski handknattleiksmaðurinn, Artem Kulak, er einn þeirra sem gagnrýnir harðlega skort á sóttvörnum á Evrópumeistaramótinu. Hann segir þær hafa verið afar slakar og mikið lakari en á heimsmeistaramótinu sem fram fór í Egyptalandi fyrir ári. „Þetta var ekki Evrópumót í handknattleik, heldur keppni í að sleppa ósmitaður,“ sagði Kulak við fjölmiðla í heimalandinu.
- Danski markvörðurinn Kim Sonne hefur slitið samningi sínum við Ribe Esbjerg og samið við HC Erlangen í Þýskalandi. Sonne flutti heim til Danmerkur á síðasta sumri eftir sjö ára veru í Þýskalandi og Frakklandi. Honum líkaði ekki dvölin í Esbjerg og stökk þar með á fyrsta tækifæri sem gafst að leika á ný í Þýsklandi hvar hann var leikmaður Kiel og síðar Minden frá 2014 til 2019.
- Auglýsing -
