Molakaffi: Frestanir, eftirlitsmenn, dómarar, Íslandstengingar

Leikmenn þýska 1. deildarliðsins hafa orðið fyrir barðinu á kórnuveirunni. Mynd/ Leipzig
  • Fyrirhuguðum leikjum Leipzig við Essen 12. nóvember og Balingen tveimur dögum síðar í þýsku 1. deild karla í handknattleik hefur verið frestað um ótiltekinn tíma. Nær allt Leipzig-liðið auk þjálfara og starfsmanna glímir við kórónuveiruna um þessar mundir eins og handbolti.is sagði frá á mánudag. 
  • Guðjón L. Sigurðsson verður eftirlitsmaður EHF á viðureign Íslands og Litháen í undankeppni EM í handknattleik karla í Laugardalshöll í kvöld. Dómarar leiksins eru danskir, Jesper Madsen og Mads Hansen. Flautað verður til leiks klukkan 19.45 og verður leikurinn sýndur á RÚV. Handbolti.is verður einnig á staðnum og mun fylgjast með eftir föngum.
  • Leikurinn í kvöld verður sá sjötti á milli Íslendinga og Litháa í handknattleik karla. Ísland hefur unnið þrjár viðureignir, Litháar eina og í eitt skipti hafa þjóðirnar skilið jafnar, 27:27, í júní 2018 í umspilsleikjum fyrir HM sem fram fór í Þýskalandi og Danmörku árið eftir. 
  • Mindaugas Andriuska , landsliðsþjálfari Litháen, lék með ÍBV leiktíðina 2001/2002. Fleiri leikmenn landsliðs Litháen tengjast Íslandi með einum eða öðrum hætti.  Giedrius Morkunas lék árum saman með Haukum, Vilius Rasimas, annar markvörður, leikur nú með Selfossi og örvhenta skyttan Mindaugas Dumicius lék með Akureyri handboltafélagi tímabilið 2016 til 2017.
  • Hollenskur eftirlitsmaður sem átti að hafa gætur á viðureign Hollendinga og Tyrkja í undankeppni EM í handknattleik karla í Almere í Hollandi í kvöld greindist smitaður af kórónuveirunni í gær. Í hans stað kemur maður yfir landamærin frá Belgíu. Erlingur Richardsson er landsliðsþjálfari Hollendinga.
  • Viðureign Dana og Svisslendinga í undankeppni EM, sem fram átti að fara í Árósum í kvöld, var frestað í gærkvöld vegna gruns um kórónuveirusmit í herbúðum svissneska liðsins. Ekki var ljóst seint í gærkvöld hvort reynt verður að koma leiknum á dagskrá annað kvöld. Væntanlega skýrist það í dag þegar ljós niðurstaða fæst úr skimun meðal leikmanna landsliðsins Sviss en það er ókomið til Danmerkur. Ákvörðunin er í höndum Handknattleikssambands Evrópu en Danir segjast vera klárir í að hýsa leikinn á fimmtudagskvöld. Þeir fara síðan til Finnlands og mæta heimamönnum á laugardag, einnig í undankeppni EM.
- Auglýsing -

Nýjustu fréttir

- Auglýsing -