Gellir Michaelsson var kynntur til leiks hjá Vængjum Júpiters í gær. Mynd/VJ
  • Gellir Michaelsson  er nýjasti liðsmaður Vængja Júpiters sem leikur í Grill 66-deild karla á keppnistímabilinu sem hefst síðar í þessum mánuði. Gellir var einn leikmanna Kríu á síðasta tímabili. Þar áður lék hann m.a. með FH. 
  • Ágúst Elí Björgvinsson, landsliðsmarkvörður, átti afar góðan leik í marki KIF Kolding í gærkvöld þegar liðið vann Lemvig, 32:30, í fyrstu umferð dönsku úrvalsdeildarinnar í handknattleik karla. Leikurinn fór fram í Kolding. Ágúst Elí stóð lengst af í marki Kolding og varði 12 skot, 32,4%. Að frádregnum vítaköstum var Ágúst Elí með 37,5% hlutfallsmarkvörslu. Þar að auki skoraði hann eitt mark í fyrri hálfleik. 
  • Handknattleiksdómararnir Anton Gylfi Pálsson og Jónas Elíasson er komnir til Ystad í Svíþjóð. Þar eiga þeir fyrir höndum að dæma síðari viðureign Ystad og Bjerringbro/Silkeborg sem fram fer í dag. Um er að ræða síðari viðureign liðanna í 1. umferð Evrópudeildarinnar í handknattleik karla. Ystad er með eins marks forskot eftir fyrri viðureignina sem liðið vann, 23:22. 
  • Steinunn Hansdóttir skoraði þrjú mörk í fimm tilraunum og var einu sinni vísað af leikvelli þegar lið hennar, Skanderborg Håndbold, tapaði fyrir Viborg á útivelli, 34:24, í dönsku úrvalsdeildinni í handknattleik í gær. Viborg er með afar sterkt lið og lék til úrslita um danska meistaratitilinn í vor. Skanderborg hefur tapaði tveimur fyrstu leikjum sínum í dönsku úrvalsdeildinni á keppnistímabilinu sem hófst fyrr í vikunni. 
  • Spænska landsliðskonan Marta Lopez  sleit krossband á sunnudaginn og verður frá keppni næsta árið. Fjarvera Lopez er áfall fyrir spænska landsliðið sem leikur á heimavelli á HM í desember. Lopez gekk til liðs við Rapid Búkarest í sumar eftir að hafa verið í herbúðum Valcea í Rúmeníu um nokkurt skeið.
- Auglýsing -

Nýjustu fréttir

- Auglýsing -