- Auglýsing -
- Grétar Ari Guðjónsson átti enn einn stórleikinn í marki Nice í gærkvöld þegar liðið vann Angers, 38:23, á útivelli í frönsku 2. deildinni í handknattleik. Hafnfirðingurinn stóð lengst af leiksins í marki Nice og varði á þeim tím 13 skot, 43,3%. Nice er nú komið upp í fimmta sæti deildarinnar eftir að hafa unnið hvern leikinn á fætur öðrum upp á síðkastið.
- Sandra Erlingsdóttir og samherjar í EH Aalborg unnu sætan sigur á Hadsten Håndbold, 30:28, í dönsku 1. deildinni í handknattleik kvenna á útivelli í gær. Sandra lék vel og skoraði m.a. fjögur mörk, þar af tvö úr vítaköstum. EH Aalborg er í fimmta sæti deildarinnar með 16 stig eftir 12 leiki og er sex stigum á eftir SönderjyskE sem er eitt í efsta sæti.
- Óskar Ólafsson skoraði tvö mörk og Viktor Petersen Norberg eitt þegar lið þeirra Drammen vann Bækkelaget, 31:26, í norsku úrvalsdeildinni í gær. Drammen er áfram í öðru sæti deildarinnar, sex stigum á eftir Elverum.
- Orri Freyr Þorkelsson skoraði þvisvar sinnum í stórsigri Elverum á Sanderfjord í gær, 38:19, en leikið var í Terninen Arena, heimavelli norsku meistaranna.
- Örn Vésteinsson Östenberg lét eitt mark duga þegar lið hans Tønsberg Nøtterøy náði jafntefli á útivelli á móti Halden, 30:30, í norsku úrvalsdeildinni í gær. Tønsberg Nøtterøy hefur aðeins mjakast ofar í deildinni upp á síðkastið og er nú komið upp í 11. sæti af 14 liðum með 10 stig eftir 15 leiki. Sandefjord, Haslum og Bergen eru fyrir neðan.
- Lærisveinar Hannesar Jóns Jónssonar í Alpla Hard unnu grannaslaginn við Bregenz í austurrísku 1. deildinni í handknattleik á heimavelli í gær, 27:26. Þar með komst meistaralið Alpla Hard aftur í efsta sæti deildarinnar Hard er stigi á undan Krems og tveimur ofar en Aon Fivers. Bregenz er í fjórða sæti fjórum stigum frá toppliðinu.
- Arnar Birkir Hálfdánsson skoraði þrjú mörk og átti fimm stoðsendingar fyrir EHV Aue er liðið gerði jafntefli við Dormagen á heimavelli í gær, 28:28, í þýsku 2. deildinni í handknattleik. Sveinbjörn Pétursson markvörður var ekki í leikmannahópi Aue í leiknum. EHV Aue er í slæmri stöðu í þriðja neðsta sæti deildairnnar með níu stig eftir 17 leiki.
- Anton Rúnarsson skoraði ekki mark en átti eina stoðsendingu þegar lið hans TV Emsdetten tapaði á útivelli fyrir ASV Hamm-Westfalen, 34:31, í gær en liðin eru í 2. deild í Þýskalandi.
- Auglýsing -
