- Auglýsing -
- Guðjón Björnsson lét nýverið af störfum sem formaður handknattleiksdeildar HK eftir tveggja ára setu á stóli formanns. Þetta kemur fram í tilkynningu á heimasíðu HK í gær. Áður hafði Guðjón verðið formaður barna- og unglingaráðs um þriggja ára skeið ásamt því að hafa verið í heimaleikjaráði um árabil. Guðjón heldur áfram að sitja í heimaleikjaráði. Ekki kemur fram í tilkynningu HK hver tekur við formannsembættinu af Guðjóni.
- Elliði Snær Viðarsson skoraði tvö mörk þegar Gummersbach vann úkraínska meistaraliðið HC Motor Zaporozhye, 38:32, í æfingaleik í Schwalbe-Arena í Gummersbach í gærkvöld. HC Motor verður gestalið í þýsku 2. deildinni á komandi leiktíð sem hefst um mánaðarmótin. Gummersbach leikur hinsvegar á ný í 1. deild eftir nokkra veru í 2. deild. Roland Eradze er aðstoðarþjálfari HC Motor.
- Filip Jicha hefur framlengt samning sinn um þjálfun þýsku bikarmeistaranna THW Kiel til ársins 2026. Jicha tók við þjálfun Kiel af Alfreð Gíslasyni fyrir þremur árum.
- Flensburg staðfesti í gær að samið hafi verið við hollenska landsliðsmanninn Kay Smits frá og með sumrinu 2023. Smits hefur þá lokið við að uppfylla samning sinn við meistaraliðið Magdeburg. Samningur Flensburg við Smits er til tveggja ára. Hann á að leysa af Norðmanninn Magnus Rød sem heldur heim á leið og verður liðsmaður Kolstad í Þrándheimi.
- Norska landsliðskonan Marta Tomac leikur ekki með landsliðinu í titilvörninni á EM í nóvember. Hún sagði frá því í gær að hún væri barnshafandi. Tomac er þriðja norska landsliðskonan sem barn undir belti um þessar mundir. Hinar eru Kari Brattset Dale og Sanna Solberg-Isaksen. Tomac var í sigurliði Noregs á EM fyrir tveimur árum en var ekki í sigurliðinu á HM á Spáni í desember á síðasta ári.
- Engan bilbug er að finna á norska landsliðsmarkverðinum Katrine Lunde þótt hún sé orðinn 42 ára gömul. Lunde segist stefna ótrauð á að vera til taks með norska landsliðinu á Ólympíuleikunum í Frakklandi eftir tvö ár.
- Auglýsing -
