- Auglýsing -
- Franski landsliðsmaðurinn Michaël Guigou hefur ákveðið að láta gott heita sem atvinnumaður í handknattleik. Guigou er fertugur og hefur árum saman átt sæti í franska landsliðinu og með því unnið allt sem landslið getur unnið og það oftar en einu sinni. Guigou var tvisvar í sigurliði Montpellier í Meistaradeild Evrópu og varð tíu sinnum franskur meistari í handknattleik. Síðustu tvö ár hefur Guigou verið leikmaður Nimes en lengst af var hann liðsmaður Montpellier.
- Skrifað var í gær undir samkomulag á milli Handknattleikssambands Evrópu, EHF, og stjórnvalda í Norðurrín-Vestfalíu þess efnis að úrslitahelgi Meistaradeildar karla í handknattleik fari áfram fram í Lanxess-Arena í Köln fram til ársins 2026. Samingurinn í gær nær yfir árin 2025 og 2026. Leikir úrslitahelgi Meistaradeildar karla hafa farið fram í Lanxess-Arena frá árinu 2010 þegar ákveðið var að reyna þetta fyrirkomulag, þ.e. að leika undanúrslitaleikina og úrslitaleikina á tveimur dögum á sama stað.
- Rúmenska línukonan Crina Pintea hefur ákveðið að yfirgefa Györ eftir eins árs dvöl og ganga á ný til liðs við CSM Búkarest sem hún lék með frá 2019 til 2021.
- Ungverski landsliðsmaðurinn Dominik Máth flytur sig um set í sumar og kveður norska meistaraliðið Elverum og gengur til liðs við frönsku meistarana PSG. Sá böggull fylgir skammrifi að Máth meiddist alvarlega á hné um miðjan febrúar. Máth gerir sér vonir um að ná sé á strik þegar kemur fram á næsta ár og geta leikið með PSG á lokaspretti frönsku deildarinnar. Máth hafði samið við franska liðið nokkuð áður en hann meiddist.
- Auglýsing -
