Hafsteinn Óli Berg Ramos Rocha t.h. hefur verið lánaður til HK. Mynd/Egill Bjarni Friðjónsson
  • Afturelding hefur lánað handknattleiksmanninn Hafstein Óla Berg Ramos Rocha til HK frá og með 3. september til 1. júní á næsta ári eftir því sem fram kemur á félagaskiptasíðu HSÍ. Hafsteinn kom til Aftureldingar sumarið 2020 frá Fjölni.
  • Ágúst Ingi Óskarsson hefur ákveðið að leika með Neistanum í Þórshöfn á komandi keppnistímabili. Ágúst Ingi er tvítugur og kemur til Neistans frá HK. Arnar Gunnarsson er þjálfari Neistans. Hann er að hefja sitt annað keppnistímabil með Þórshafnarliðinu. Handbolti.is greindi frá því á dögunum að Felix Már Kjartansson hafi einnig ákveðið að söðla um, kveðja HK og leika með Neistanum á næstu leiktíð.
  • Axel Stefánsson er áfram á sigurbraut með Storhamar í norsku úrvalsdeildinni í handknattleik kvenna. Í gærkvöld vann Storhamar lið Tertnes, 33:25, í síðasta leik annarrar umferðar deildarinnar. Storhamar er með fullt hús stiga og mætir Fredrikstad Bkl. í Kongstenhallen í Fredrikstad á laugardaginn. Elías Már Halldórsson þjálfar Fredrikstad Bkl. en hann var aðstoðarmaður Axels hluta þess tíma sem sá síðarnefndi var þjálfari íslenska kvennalandsliðsins í handknattleik á árunum 2016 til 2019.
  • Einn þekktasti handknattleiksmaður Dana á síðustu árum, hornamaðurinn Lasse Svan, greindi frá því í gær að hann ætlar að leggja skóna á hilluna á næsta sumri. Samningur Svan við Flensburg rennur út í vor. Hann er 38 ára gamall og hefur unnið alla stóru titilana þrjá með danska landsliðinu auk þess að vera í sigurliði Flensburg í Meistaradeild Evrópu árið 2014.
  • José Ignacio Prades hefur verið ráðinn landsliðsþjálfari Spánar í handknattleik kvenna. Prades tekur við að Carlos Viver sem sagt var upp fyrir helgina. Prades bíður það stóra verkefni að stýra landsliðinu á HM á heimavelli í desember. Fyrstu leikir með Prades við stjórnvölin verða þó í undankeppni EM í byrjun október.
- Auglýsing -

Nýjustu fréttir

- Auglýsing -