Hannes Jón Jónsson, þjálfari Alpla Hard í Austurríki. Mynd/Alexandra Köß
  • Hannes Jón Jónsson og lærisveinar hans í Alpla Hard unnu liðsmenn Voslauer afar léttilega með 17 marka mun í annarri umferð austurrísku 1. deildarinnar á heimavelli í gær. Alpla Hard, sem er ríkjandi meistari, hefur unnið tvo fyrstu leiki sína í deildinni. 
  • Andrea Jacobsen og stöllur í Kristianstad eru komnar með sæti í átta liða úrslitum sænsku bikarkeppninnar í handknattleik. Kristianstad vann Aranäs, 23:18, í síðari viðureign liðanna í 16-liða úrslitum í gær og samanlagt með 14 marka mun í tveimur leikjum, 54:40. Andrea kom lítið við sögu í leiknum í gær og skoraði m.a. ekki mark. 
  • Íslendingaliðið Volda gerði jafntefli við Levanger í fyrsta leik sínum í norsku 1. deildinni í handknattleik í gær. Leikurinn var hnífjafn og spennandi svo jafnt var einnig í hálfleik, 13:13. Katrín Tinna Jensdóttir skoraði ekki mark fyrir Volda í leiknum en lét til sín taka í vörninni og var fyrir vikið einu sinni vísað af leikvelli í tvær mínútur. Halldór Stefán Haraldsson er þjálfari liðsins og Hilmar Guðlaugsson er honum til halds og trausts. 
  • Magnús Orri Axelsson var í liði Viking sem tapaði í gær með fjögurra marka mun, 30:26, fyrir Vikhammer í norsku 1. deildinni í handknattleik. Leikið var í Malvikhallen í Þrándheimi. Magnús Orri, sem gekk til liðs við Viking í sumar, skoraði ekki mark að þessu sinni. 
  • Birta Rún Grétarsdóttir var í leikmannahópi Oppsal sem vann Romerike Ravens, 32:26, í þriðju umferð norsku úrvalsdeildarinnar í handknattleik í gær. Þetta var fyrsti sigur Oppsal í deildinni á leiktíðinni. Birta Rún er óðum að ná sér á strik eftir að hafa slitið krossband í hné fyrir um ári síðan.  Hún skoraði þó ekki mark í leiknum í gær.
- Auglýsing -

Nýjustu fréttir

- Auglýsing -