- Auglýsing -
- Harpa Rut Jónsdóttir skoraði eitt mark þegar lið hennar LK Zug vann Herzogenbuchsee, 27:24, í fyrstu umferð svissnesku úrvalsdeildarinnar í handknattleik í gær. Harpa og félagar eru ríkjandi meistarar í Sviss.
- Afar góður leikur Elínar Jónu Þorsteinsdóttur, landsliðsmarkvarðar, dugði skammt þegar lið hennar Ringköbing tapaði fyrir NFH (Nyköbing Falster), 31:21, í dönsku úrvalsdeildinni í handknattleik í gær.
- Elín Jóna varði 12 skot sem gerði 32% hlutfallsmakvörslu, í leiknum. NFH var með þriggja marka forskot í hálfleik, 13:10. Ringköbing, sem er nýliði í deildinni, er án stiga eftir tvær umferðir.
- Sara Dögg Hjaltadóttir skoraði eitt mark og var einu sinni vísað af leikvelli þegar lið hennar Gjerpen vann Nordstrand, 29:22, á útivelli í 1. umferð norsku 1. deildarinnar, B-deild, í gær. Sara Dögg fluttist um set í sumar. Fór frá Volda eftir tveggja ára veru yfir til Gjerpen.
- Guðmundur Þórður Guðmundsson þjálfari fagnaði sigri í síðasta æfingaleik MT Melsungen áður en keppni hefst í þýsku 1. deildinni í handknattleik á miðvikudagskvöldið. MT Melsungen vann GWD Minden, 22:17, á heimavelli í fyrradag. Elvar Örn Jónsson skoraði fimm mörk fyrir Melsungen-liðið. Alexander Petersson og Arnar Freyr Arnarsson skoruðu eitt mark hvor. MT Melsungen mætir bikarmeisturum Lemgo í fyrstu umferð en liðin mættust í úrslitaleik þýsku bikarkeppninnar í vor. Bjarki Már Elísson og samherjar í Lemgo unnu þá viðureign og unnu þar með bikarkeppnina í fyrsta sinn í 19 ár.
- Carlos Viver sem þjálfað hefur spænska kvennalandsliðið síðasta hálfa fimmta árið er hættur störfum, þremur mánuðum áður en flautað verður til leiks á heimsmeistaramótinu sem haldið verður á Spáni. Óánægja er með árangur spænska landsliðsins á tveimur síðustu stórmótum, EM í Danmörku í desember í fyrra og á Ólympíuleikunum í Japan í sumar. Ekki liggur fyrir hver tekur við starfinu af Viver sem heldur áfram störfum sem aðalþjálfari kvennaliðs Dinamo Búkarest.
- Auglýsing -
