- Auglýsing -

Molakaffi: Haukur, Arnór Þór, Stojanovic, á fjárhagslegum brauðfótum

Haukur Þrastarson leikmaður Vive Kielce. Mynd/Vive Kielce
  • Haukur Þrastarson var í liði Łomża Vive Kielce í gærkvöldi þegar það vann Gwardia Opole, 27:22, í pólsku úrvalsdeildinni í handknattleik. Hann skoraði ekki mark og brást bogalistin einu sinni úr vítakasti, bregðist tíðindamanni handbolta.is ekki pólskukunnáttan. Sigvaldi Björn Guðjónsson var ekki í leikmannahópi Kielce-liðsins sem hefur fullt hús stiga eftir 15 leiki. 
  • Arnór Þór Gunnarsson er í liði 19. umferðar þýsku 1. deildarinnar í handknattleik en greint var frá liði umferðinnar í gær. Nítjánda umferð fór fram á miðviku- og fimmtudagskvöld. Arnór Þór lék afar vel fyrir Bergischer HC á fimmtudaginn í sigri á Göppingen á heimavelli, 33:27. Arnór Þór skoraði m.a. fjögur mörk úr jafnmörgum tilraunum. Þetta er í fyrsta sinn á leiktíðinni sem Arnór er í liði umferðarinnar. 
  • Handknattleikskonan Tina Stojanovic hefur gengið til liðs við Fjölni/Fylki í Grill66-deild kvenna. Hún lék áður með ÍR sem einnig á sæti í Grill66-deildinni. 
  • Norska úrvalsdeildarliðið Nøtterøy Tønsberg stendur á fjárhagslegum brauðfótum um þessar mundir. Ef marka má fregnir Tønsberg Blad, tb.no, þá hefur öllum leikmönnum liðsins verið gefið grænt ljós á að losna undan samningi takist þeim að komast á samning hjá öðru liði, innan eða utan Noregs. Íslendingurinn Örn Östenberg Vésteinsson er einn leikmanna liðsins. Robert Hedin þjálfar liðið og Glenn Solberg landsliðsþjálfari Evrópumeistara Svíþjóðar þjálfar yngri flokka félagsins.
- Auglýsing -
- Auglýsing -

Nýjustu fréttir

- Auglýsing -