Molakaffi: Haukur, Sigvaldi, Bjarni, Sävehof í vanda, Fabregas

Haukur Þrastarson landsliðsmaður og leikmaður Kielce í Póllandi. Mynd/Hafliði Breiðfjörð
  • Haukur Þrastarson var ekki í leikmannahópi Łomża Vive Kielce þegar liðið vann enn einn stórleikinn í pólsku úrvalsdeildinni í gær þegar liðsmenn Piotrkowianin komu í heimsókn, 39:21. Sigvaldi Björn Guðjónsson er ennþá frá keppni vegna meiðsla. Łomża Vive Kielce er með fullt hús stiga eftir 25 leiki í efsta sæti deildarinnar. 
  • Bjarni Ófeigur Valdimarsson var besti leikmaður IFK Skövde þegar liðið tapaði á heimavelli í gær fyrir Kristianstad, 28:24, í þriðja undanúrslitaleik liðanna um sænska meistaratitilinn í handknattleik. Bjarni Ófeigur skoraði sex mörk og átti þrjár stoðsendingar í leiknum og þótti einnig leika vel í vörninni. Næsti leikur liðanna verður í Kristianstad á mánudaginn. 
  • Sænsku meistararnir í Sävehof eru komnir í vandræði eftir að hafa tapað tvisvar sinnum fyrir Ystads IF í hinni rimmu undanúrslitanna. Sävehof er án sigurs og verður að vinna á heimavelli á mánudaginn ætli liðið sér ekki að sitja eftir með sárt ennið. Aðeins tveimur leikjum er lokið í rimmu Sävehof og Ystads.
  • Franski landsliðsmaðurinn Ludovic Fabregas fór undir hnífinn í gær eftir að hafa fengið botnlangakast. Hann leikur þar af leiðandi ekki með Barcelona í hvorugum leiknum gegn Teiti Erni Einarssyni og félögum í Flensburg í átta liða úrslitum Meistaradeildar Evrópu í handknattleik. Fyrri viðureignin verður á miðvikudaginn. Barcelona hefur aðeins yfir að ráða einum línumanni nú um stundir.
- Auglýsing -

Nýjustu fréttir

- Auglýsing -