- Auglýsing -
- Haukur Þrastarson skoraði þrjú mörk og Sigvaldi Björn Guðjónsson tvö þegar Vive Kielce vann Lubin, 38:24, í pólsku úrvalsdeildinni í handknattleik í gær. Báðir voru þeir með fullkomna skotnýtingu í leiknum. Yfirburðir Kielce voru miklir í leiknum. Þegar að loknum fyrri hálfleik var forskot liðsins komið upp í 11 mörk, 18:7. Kielce er efst í deildinni með 33 stig eftir 11 leiki eins og Wisla Plock. Önnur lið standa þessum tveimur talsvert að baki.
- Sebastian Barthold tryggði Aalborg annað stigið gegn GOG í viðureign efstu liðanna í dönsku úrvalsdeildinni í handknattleik í gær, 30:30. Aalborg var sex mörkum yfir, 25:19, þegar stundarfjórðungur var liðinn af síðari hálfleik. Viktor Gísli Hallgrímsson, markvörður GOG, kom lítið við sögu í leiknum. Aron Pálmarsson lék ekki með Aalborg. Hann er úr leik um þessar mundir sökum höfuðhöggs sem hann hlaut í leik fyrir viku. Arnór Atlason er sem fyrr aðstoðarþjálfari Aalborg sem hefur tapað fimm stigum í deildinni á keppnistímabilinu. GOG er efst og hefur aðeins tapað einu stigi það sem af er keppni í dönsku úrvalsdeildinni í 12 leikjum.
- Bjarni Ófeigur Valdimarsson skoraði fimm mörk fyrir IFK Skövde í gær þegar liðið vann Ramat Hasharon frá Ísrael, 35:29, í seinni viðureign liðanna í 32-liða úrslitum Evrópubikarkeppninnar. Skövde vann leikina tvo við Ramat Hasharon samanlagt, 72:57.
- Hákon Daði Styrmisson skoraði fimm mörk og Elliði Snær Viðarsson eitt þegar Gummersbach treysti stöðu sína í efsta sæti þýsku 2. deildarinnar með góðum sigri á Nordhorn, 28:22, á heimavelli Nordhorn í gær. Gummersbach er í efsta sæti deildarinnar með 22 stig eftir 13 leiki. Eintracht Hagen er í öðru sæti með 19 stig og Nordhorn situr í þriðja sæti með 18 stig.
- Arnar Birkir Hálfdánsson skoraði eitt mark og átti þrjár stoðsendingar þegar lið hans EHV Aue steinlá í heimsókn til Eisenach, 33:24. Sveinbjörn Pétursson varði 10 skot, 30%, í marki Aue á þeim 40 mínútum sem hann stóð vaktina. EHV Aue er komið á hættulegar slóðir í deildinni, í 18. og þriðja neðsta sæti með átta stig eftir 13 leiki.
- Auglýsing -
