- Auglýsing -
- Aron Rafn Eðvarðsson markvörður Hauka lék ekki með liðinu í gær gegn ÍBV í Vestmannaeyjum. Hann fékk högg á höfuðið sem olli heilahristingi á laugardaginn. Aron Rafn gæti þar af leiðandi verið frá keppni um skeið.
- Róbert Sigurðarson, varnarmaðurinn sterki hjá ÍBV, var heldur ekki með í leiknum í gær. Fram kom í lýsingu ÍBVtv frá viðureign ÍBV og Hauka að Róbert hafi nefbrotnað á dögunum. Hætt er við að Róbert verði frá keppni næstu vikur af þessum sökum.
- Fannar Þór Friðgeirsson var í leikmannahópi ÍBV í gær gegn Haukum. Fannar Þór sem lagði skóna á hilluna á síðasta sumri og flutti norður á Akureyri til að reka Bakaríið við Brúna var í langri helgarferð í Vestmannaeyjum og gaf kost á sér í liðið í leiknum gær eftir að hafa tekið æfingu með fyrrverandi samherjum.
- Egill Magnússon missti af öðrum leiknum í röð með FH í gærkvöld þegar liðið mætti Stjörnunni í Kaplakrika. Egill glímir við meiðsli eftir að hafa orðið fyrir hnjaski í undanúrslitaleik Vals og FH fyrir um tveimur vikum. Óvíst er hvenær stórskyttan er væntanlega til leiks á ný.
- Óskar Ólafsson skoraði eitt mark og Viktor Norberg Petersen sex þegar lið þeirra Drammen vann Suhr Aarau frá Sviss, 31:29, í fyrri viðureign liðanna í átta liða úrslitum Evrópubikarkeppninnar í handknattleik karla í Drammen í gær. Liðin mætast á ný í Sviss um næstu helgi.
- Ýmir Örn Gíslason skoraði eitt mark fyrir Rhein-Neckar Löwen þegar liðið tapaði á heimavelli í gær fyrir Füchse Berlin í þýsku 1. deildinni í handknattleik, 29:24. Berlínarliðið skaust upp í þriðja sæti deildarinnar með sigrinum. Rhein-Neckar Löwen er í 10. sæti.
- Auglýsing -
