- Auglýsing -
- Hulda Dís Þrastardóttir, sem gekk til liðs við uppeldisfélag sitt Selfoss í sumar frá Val, varð fyrir því óláni að slíta krossband eftir að hafa æft með Selfossliðinu í fáeinar vikur í sumar. Af því leiðir að hún leikur ekkert með nýliðum Selfoss á keppnistímabilinu sem stendur fyrir dyrum og hefst í kvöld með viðureign Stjörnunnar og Fram í TM-höllinni klukkan 18.
- Róbert Sigurðarson leikmaður ÍBV er að jafna sig eftir að hafa nefbrotnað. Af þeirri ástæðu var hann ekki með ÍBV í leikjunum við Holon HC í 1. umferð Evrópubikarkeppninni um síðustu helgi. Theodór Sigurbjörnsson og Arnór Viðarsson eru einnig fjarverandi hjá ÍBV vegna meiðsla. ÍBV sækir KA heim í Olísdeild karla á laugardaginn.
- Ásgeir Snær Vignisson skoraði fjögur mörk og var einu sinni vísað af leikvelli í tvær mínútur þegar lið hans Helsingborg vann Alingsås á útivelli, 34:33, í fyrstu umferð sænsku úrvalsdeildarinnar í handknattleik í gær.
- Aðalsteinn Eyjólfsson og lærisveinar hans í meistaraliðinu Kadetten Schaffhausen töpuðu fyrir HC Kriens-Luzern, 34:30, á heimavelli í svissnesku A-deildinni í gærkvöld. Þetta var fyrsti sigur Kriens í Schaffhausen i sjö ár. Kadetten er enn efst þrátt fyrir tapið með átta stig eftir fimm leiki. HC Kriens-Luzern er í öðru sæti með sjö stig að loknum fjórum leikjum.
- Andy Schmid, sem gekk til liðs við HC Kriens-Luzern, í sumar eftir meira en áratug með Rhein-Neckar Löwen, fór enn einu sinni á kostum í gærkvöld. Hann skoraði 12 mörk og átti sex stoðsendingar. Alls hefur svissneski landsliðsmaðurinn skorað 46 mörk í fjórum fyrstu leikjum sínum í deildinni. Króatíski línumaðurinn Marin Sipic skoraði 10 mörk og var með fullkomna nýtingu í liði Kriens sem virðist til alls líklegt á keppnistímabilinu.
handbolti.is nýtur ekki opinbers rekstrarstuðnings.
- Auglýsing -
