- Auglýsing -
- Arnar Gunnarsson og lærisveinar í Neistanum unnu í gærkvöld efsta lið færeysku úrvalsdeildarinnar, VÍF frá Vestmanna, 30:29, á heimavelli í hörkuleik. Neistin var fjórum mörkum yfir í hálfleik, 17:13. Liðið er í þriðja sæti deildarinnar, sjö stigum á eftir VÍF.
- Hörður Fannar Sigþórsson og samherjar í KÍF frá Kollafirði lögðu nýkrýnda bikarmeistara H71, 32:26, í Kollafirði einnig í gærkvöld í færeysku úrvalsdeildinni í handknattleik. Hörður Fannar skoraði tvö mörk fyrir KÍF sem situr í fjórða sæti. H71 er öðru sæti.
- Sigvaldi Björn Guðjónsson skoraði fimm mörk í tíu skotum þegar Vive Kielce vann Zabrze, 34:30, á heimavelli í pólsku úrvalsdeildinni í handknattleik í gær. Alex Dujshebaev var markahæstur hjá Kielce með sjö mörk. Vive Kielce er langefst í deildinni en liðið hefur unnið allar 16 viðureignir sínar á tímabilinu.
- Elvar Örn Jónsson skoraði 4 mörk í 11 skotum og átti eina stoðsendingu þegar Skjern vann Kolding, 32:29, í dönsku úrvalsdeildinni í gær en leikið var í Skjern. Ágúst Elí Björgvinsson stóð í marki Kolding hluta leiksins og varði 4 skot, 20% hlutfallsmarkvarsla. Kolding er í áttunda sæti þegar liðið á þrjá leiki eftir, er þremur stigum fyrir ofan Ribe-Esbjerg. Átta efstu liðin fara í úrslitakeppnina um meistaratitilinn. Skjern stendur vel að vígi í sjöunda sæti, er fjórum stigum á undan Kolding og á fjóra leiki eftir óleikna.
- Óðinn Þór Ríkharðsson komst ekki á blað yfir markaskorara hjá Holstebro í fjögurra marka sigri á Ringsted, 29:25. Holstebro er í fjórða sæti dönsku úrvalsdeildarinnar.
- Auglýsing -
