- Auglýsing -
- Nikolaj Jacobsen þjálfari heimsmeistara Danmerkur í handknattleik karla ferðast ekki með landsliðinu til Sviss þar sem Danir mæta heimamönnum í undankeppni EM annað kvöld. Jacobsen fór í aðgerð á hné fyrir nærri þremur vikum vegna gamalla íþróttameiðsla. Hann segist ekki vera orðinn nógu góður til að ferðast og sitja í flugvél.
- Henrik Kronborg, aðstoðarþjálfari, mun bera hitan og þungan af stjórn danska landsliðsins í leiknum í Winterthur. Danir eru komnir með annan fótinn í lokakeppni EM, hafa sex stig eftir fjóra leiki í 7. riðli. Danir mæta Finnum á heimavelli um helgina og mætir Jacobsen þá til leiks.
- Frank Bohmann, framkvæmdastjóri þýsku deildarkeppninnar í handknattleik karla, segir að mörg félög verði að vera duglegri við að taka PCR-próf af leikmönnum sínum en þau eru. Fjölga verði PCR-prófum og fækka svokölluðum hraðprófum þar sem marg oft hefur verið sýnt fram á að þau séu langt í frá eins árangursrík.
- Bohmann þvertekur fyrir að liðum verði gert skylt að búa saman á hóteli í einangrun síðustu mánuði deildarkeppninnar svo hægt verði að ljúka keppninni fyrir hásumarið. Dagskrá fyrstu og annarrar deildar karla er fyrir nokkru komin úr skorðum og ljóst að áfram verður rask á henni þar sem smitum virðist síst fækka á meðal handknattleiksmanna í Þýskalandi.
- Tom-Eirik Skarpsno hefur tekið við þjálfun karlaliðs Haslum HK í Noregi en liðið leikur í úrvalsdeildinni. Hann tekur við af Sten Stockfleth sem var látinn taka pokann sinn fyrir helgina eftir fjögur ár í starfi. Skarpsno hefur áður verið þjálfari hjá Haslum. Með honum í þjálfarateyminu verður m.a. Erlend Mamelund, fyrrverandi landsliðsmaður og atvinnumaður í Þýskalandi.
- Auglýsing -
