- Auglýsing -

Molakaffi: Kári, Sigþór, Kristján, Alfreð, Króatar, Haaß, Sveinn, Aðalsteinn, lært af reynslunni

Þríeykið sem skrifað hefur undir nýja samninga við HK. Mynd/HK
  • Þrír leikmenn Olísdeildar liðs HK, Kári Tómas Hauksson, Sigþór Óli Árnason og Kristján Ottó Hjálmsson hafa skrifað undir nýja tveggja ára samninga við félagið, eftir því sem greint er frá á heimasíðu HK. Um er að ræða uppalda HK-menn sem félagið segir í tilkynningu að það leggi áherslu á að halda í. Allir hafa þeir leikið með HK-liðinu í Olísdeildinni í vetur. 
  • Þýska landsliðið í handknattleik karla, undir stjórn Alfreðs Gíslasonar, vann landslið Sviss með fimm marka mun, 30:26,  í vináttulandsleik í Mannheim í gær. Þetta var fyrri vináttuleikur þýska landsliðsins fyrir Evrópumótið en til stendur að Þjóðverjar mæti Frökkum á laugardaginn.  Þýska landsliðið var marki yfir í hálfleik, 15:14. Það var sterkara á lokasprettinum. Alfreð sagði við þýska fjölmiðla í leikslok að varnarleikurinn hafi ekki verið viðunandi fyrr en það tók að líða á leikinn. 
  • Króatar unnu afar sannfærandi sigur á Rússum í vináttulandsleik í gær, 30:24, á heimavelli. Þóttu Króatar leika afar vel þótt liðið sakni Domagoj Duvnjak og Luca Cindric sem er í einangrun með veiruna. Nokkur afföll er einnig hjá Rússum, aðallega vegna meiðsla. 
  • Michael Haaß hefur verið leystur frá störfum sem þjálfari þýska 1. deildarliðsins HC Erlangen sem Sveinn Jóhannsson gengur til liðs við í sumar. Raul Alonso, sem verið hefur íþróttastjóri liðsins, tekur við þjálfun og stýrir liðinu út keppnistímabilið. HC Erlangen er í 12. sæti af 18 liðum deildarinnar. Tap fyrir Leipzig skömmu fyrir áramót mun hafa orðið til þess að stjórnendur félagsins töldu rétt að skipta um mann í brúnni. Haaß tók við þjálfun Erlangen af Aðalsteini Eyjólfssyni fyrir nærri tveimur árum.
  • Forráðamenn austurríska handknattleikssambandsins ákváðu í gær að hætta við fyrirhugaðan vináttuleik við Slóvaka sem fram átti að fara í dag. Þeir segja ekki forsvaranlegt að taka áhættuna af því að leika um þessar mundir en smit hafa verið í herbúðum Slóvaka síðustu daga og m.a. varð að hætta við vináttuleik þjóðanna fyrr í vikunni. 
  • Talsmenn austurríska handknattleikssambandsins segjast hafa lært af reynslunni sem fékkst við undirbúning kvennalandsliðsins fyrir HM í síðasta mánuði. Þá hafi komið upp smit rétt áður en lagt var af stað til Spánar með þeim afleiðingum að báðir þjálfarar liðsins urðu eftir heima auk leikmanns. Til viðbótar greindust leikmenn smitaðir þegar á hólminn var komið á Spáni. Austurríska landsliðið leikur þar af leiðandi ekki vináttuleik fyrir EM, ekkert frekar en íslenska landsliðið og nokkur önnur. 
- Auglýsing -
- Auglýsing -

Nýjustu fréttir

- Auglýsing -