Molakaffi: Løke, Kehrmann, Racotea, sjálfboðaliðar, Christophersen, O’Callaghan, Laporta

Heidi Løke gefur ekki kost á sér í norska landsliðið fyrir Ólympíuleikana í sumar. Mynd/EPA
  • Norska handknattleikssambandið greindi frá því gær að hin þrautreynda og sigursæla handknattleikskona Heidi Løke hafi ákveðið að gefa ekki kost á sér í norska landsliðið fyrir Ólympíuleikana sem fram eiga að fara í Tókíó í sumar. Løke er 38 ára og var í sigurliði Noregs á Ólympíuleikunum í London 2012 og bronsliðinu í Ríó fjórum árum síðar.
  • Løke segist ekki vera hætt að gefa kost á sér í landsliðið. Hinsvegar þyki henni mikilvægt að njóta sumarsins með fjölskyldunni eftir það sem á undan er gengið og gefa öðrum leikmönnum tækifæri til þess að taka þátt í Ólympíuleikum.
  • Florian Kehrmann, þjálfari þýska handknattleiksliðsins Lemgo, getur orðið fjórði þjálfarinn til þess að verða bæði bikarmeistari í Þýskalandi sem leikmaður og þjálfari. Kehrmann var leikmaður Lemgo sem vann bikarinn 2002 og í dag mætir Lemgo liði Melsungen í úrslitaleik bikarkeppninnar. Hinir eru Alfreð Gíslason, Martin Schwalb og Nikolaj Jacobsen.
  • Rúmenski landsliðsmaðurinn Dan Emil Racotea gengur til liðs við Dinamo Búkarest í sumar eftir dvöl hjá Bidasoa á Spáni. Racotea eltir þar með Xavi Pascual þjálfara Barcelona frá Spáni.
  • Alls hafa 10 þúsund af um 80 þúsund sjálfboðaliðum sem höfðu skráð sig til starfa á Ólympíuleikunum í Tókíó í sumar hætt við þátttöku. Mjög skiptar skoðanir eru á meðal Japana um að vert sé að halda leikana en kórónuveiran herjar af talsverðum krafti á þjóðina um þessar mundir.
  • Sven-Sören Christophersen framkvæmdastjóri þýska handknattleiksliðsins Hannover-Burgdorf segir að ekkert sé hæft í að samkomulag sé í höfn á milli félagsins og Barcelona um að Carlos Ortega þjálfari Hannover-Burgdorf taki við þjálfun Barcelona í sumar.
  • Joan Laporta forseti Barcelona fullyrti á dögunum að samkomulag væri í höfn. Fullyrðing Laporta fór svo illa í Christophersen og félaga að Xavier O’Callaghan, nýr framkvæmdastjóri handknattleiksliðs Barcelona, kom til Hannover í byrjun vikunnar til að biðjast afsökunar á gönuhlaupi Laporta. Hermt er að forráðamenn Hannover-Burgdorf vilji fá a.m.k. 500 þúsund evrur fyrir að leysa Ortega undan samningi.
a>
- Auglýsing -

Nýjustu fréttir

- Auglýsing -