- Auglýsing -
- Stefan Madsen, þjálfari Aalborg Håndbold segist hlakka til að vinna með Aroni Pálmarssyni þegar hann verður liðsmaður félagsins frá og með næsta keppnistímabili. „Sú staðreynd að Aron hefur valið að ganga til liðs við okkur er hrós fyrir það mikla starf sem hefur átt sér stað utan vallar sem innan hjá félaginu á undanförnum árum,” sagði Madsen í samtali við Nordjyske Stiftstidende í gær.
- Martha Hermannsdóttir lék á ný með KA/Þór í Olísdeildinni í fyrrakvöld þegar liðið sótti Stjörnuna heim. Það var fyrsti leikur þessarar þrautreyndu handknattleikskonu um langt skeið en hún hefur glímt við meiðsli síðan í lok síðasta árs. Með alla sína reynslu er Martha kærkomin viðbót í KA/Þórsliðið fyrir tvo síðustu leikina í Olísdeildinni, gegn Val á laugardaginn og við Fram annan laugardag, enda er liðið í harðri baráttu um deildarmeistaratitlinn við Framara.
- Danski landsliðsmaðurinn Casper U. Mortensen er mættur á ný á handboltavöllinn og verður með Barcelona þegar þráðurinn verður tekinn upp að nýju eftir landsleikjavikuna sem nú stendur yfir. Mortensen hefur lengi glímt við slæm meiðsli í hné og missti t.d. bæði af EM í fyrra og HM í ár af þeim sökum. Hann segist ekki velta fyrir sér þátttöku á Ólympíuleikunum í sumar. Mestu máli skiptir að ljúka yfirstandandi leiktíð án áfalla. Framundan eru átta liða úrslit í Meistaradeild þar sem Barcelona mætir PSG í tvígang.
- Auglýsing -
