Molakaffi: Morros, Toskic, Friðrik, Daníel Þór

Viran Morros, fyrir miðri mynd,tekur ekki þátt í fleiri leikjum á Ólympíuleikunum í Tókýó. Mynd/EPA
  • Spænski landsliðsmaðurinn Viran Morros hefur samið við Füchse Berlin frá og með komandi keppnistímabili. Greint var frá því um miðjan síðasta mánuð að Morros, sem er 37 ára gamall, hafi yfirgefið herbúðir PSG í Frakklandi. Hann er einn öflugasti varnarmaður Evrópu um þessar mundir og er um sannkallaðan hvalreka að ræða fyrir Berlínarliðið. Morros er þessa dagana í Tókýó með löndum sínum í franska landsliðinu. 
  • Alem Toskic nýr þjálfari Celje Lasko í Slóveníu hefur tekið til starfa. Hann var á dögunum ráðinn til fjögurra ára. Toskic, sem er Serbi, var leikmaður Celje frá 2007 til 2013. Hann lék á sínum tíma 147 landsleiki fyrir Serbíu. 

  • Friðrik krónprins Danmerkur hefur hætt við að fara til Japans til þess að fylgjast með keppni á Ólympíuleikunum þrátt fyrir að hann eigi sæti í Alþjóða Ólympíunefndinni. Hann verður að gera sér að góðu að fylgjast með leikunum eins og hver annar sem kann að hafa áhuga á leikunum.  Þetta kom fram í tilkynningu frá dönsku hirðinni í gær. 
  • Þótt margir af fremstu handknattleiksmönnum heims séu að búa sig undir þátttöku í handknattleikskeppni Ólympíuleikanna í Tókýó þá eru flest evrópsk handknattleikslið að hefja undirbúning fyrir næsta keppnistímabil og sum eru þegar byrjuð að æfa. Þýska handknattleiksliðið Balingen-Weilstetten greindi frá því í gær að nýjasti liðsmaður félagsins, íslenski landsliðsmaðurinn Daníel Þór Ingason, væri mættur til æfinga auk þess sem hann væri í óða önn að koma sér fyrir í íbúð eftir flutning frá Esbjerg í Danmörku.

- Auglýsing -

Nýjustu fréttir

- Auglýsing -