Molakaffi: Ólafur, Arnór Ágúst, Sigvaldi, Elliði, Grétar, Cindric

- Auglýsing -

Ólafur Andrés Guðmundsson skoraði eitt mark úr tveimur tilraunum þegar lið hans, Montpellier, vann Istres, 29:23, í frönsku 1. deildinni í handknattleik í gær. Montpellier hefur þrjú stig eftir tvo fyrstu leikina í deildinni. Þetta var þriðji leikur Ólafs Andrésar með liðinu á viku en það lék í Meistaradeild Evrópu um miðja vikuna.

Danska meistaraliðið Aalborg Håndbold vann Kolding í fjórðu umferð dönsku úrvalsdeildarinnar í gær. Álaborgarliðið var með yfirhöndina í leiknum frá upphafi til enda. Aron Pálmarsson var fjarri góðu gamni vegna meiðsla. Arnór Atlason er aðstoðarþjálfari liðsins. Ágúst Elí Björgvinsson varði eitt vítakast í marki Kolding en kom að öðru leyti ekki mikið við sögu.

Sigvaldi Björn Guðjónsson skoraði í tvígang fyrir Vive Kielce í öruggum sigri liðsins á Górnik Zabrze, 30:21, í pólsku 1.deildinni í gær. Haukur Þrastarson var ekki í liði Vive Kielce sem hefur níu stig eftir þrjár umferðir eins og Wisla Plock.

Elliði Snær Viðarsson tók úr leikbann í fyrrakvöld þegar lið hans Gummersbach vann Eisenach á útivelli, 29:27, í þýsku 2. deildinni í handknattleik. Hákon Daði Styrmisson skoraði ekki mark í leiknum fyrir Gummersbach. Guðjón Valur Sigurðsson er þjálfari liðsins. Gummersbach var fjórum mörkum undir í hálfleik, 17:13. Liðinu tókst að jafna metin, 22:22, þegar tíu mínútur voru til leiksloka og ná í framhaldinu þriggja marka forskoti um skeið. Gummersbach er með fjögur stig eftir tvær fyrstu umferðirnar.

Grétar Ari Guðjónsson varði sjö skot, þar af eitt vítakast, þegar lið hans Nice tapaði fyrir US Ivry í frönsku 2. deildinni í handknattleik á föstudagskvöld. Leikið var á heimavelli US Ivry sem féll úr 1. deild í vor.

Evrópumeistarar Barcelona hafa staðfest að axlarmeiðsli sem Slóveninn Luka Cindric hlaut í viðureign gegn Flensburg í Meistaradeild Evrópu á fimmtudagkvöld séu það slæm að Cindric leiki ekki með liðinu næstu sex til átta vikur.

- Auglýsing -