- Auglýsing -
- Ómar Ingi Magnússon er í liði 7. umferðar í þýsku 1. deildinni í handknattleik eftir að hafa verið aðsópsmikill í öruggum sigri SC Magdeburg á Flensburg, 33:28, á heimavelli á sunnudaginn. Selfyssingurinn skoraði m.a. átta mörk í leiknum. Ómar Ingi er um þessar mundir fimmti á lista yfir markahæstu leikmenn deildarinnar með 43 mörk. Hann er fjórum mörkum á eftir Marcel Schiller hornamanni Göppingen.
- Hákon Daði Styrmisson er öðru sinni á skömmum tíma í liði umferðarinnar í þýsku 2. deildarinni. Hann er í liði 6. umferðar sem tilkynnt var í gærmorgun. Hákon Daði átti afar góðan leik þegar Gummersbach vann nauman sigur á TV Emsdetten, 23:22, á útivelli í fyrrakvöld. Eyjapeyinn var einnig í liði 4. umferðar. Hákon Daði er sjöundi markahæsti leikmaður 2. deildar með 40 mörk, hefur skoraði fimm mörkum færra en Sven Wesseling leikmaður Bietigheim.
- Maik Machulla þjálfari þýska handknattleiksliðsins Flensburg skifaði undir nýjan samning við félagið sem gildir til ársins 2026. Hann hefur þjálfað liðið síðustu fjögur ár.
- Danski handknattleiksmaðurinn Thomas Mogensen hefur ákveðið að leggja handboltaskóna á hilluna næsta vor eftir langan feril. Hann leikur nú með SønderjyskE. Hann yfirgefur ekki félagið heldur tekur við starfi utanvallar. Mogensen hefur leikið 106 landsleiki og var m.a. í silfurliði Dana á HM 2011 og í sigurliðinu á EM árið eftir. Lengi lék Mogensen með Flensburg í Þýskalandi.
- Auglýsing -
