- Auglýsing -
- Ómar Ingi Magnússon var valinn í lið 2. umferðar þýsku 1. deildarinnar í gær. Annarri umferð lauk í fyrrakvöld en þá marði SC Magdeburg nýliða Gummersbach með tveggja marka mun, 30:28 í Schwalbe-Arena, heimavelli Gummersbach. Ómar Ingi skoraði átta mörk og gaf sex stoðsendingar í leiknum fyrir Magdeburgliðið.
- Tryggvi Þórisson og samherjar í Sävehof standa vel að vígi eftir sigur á Guif, 33:23, í Eskilstuna í gær í fyrri viðureign liðanna í 16-liða úrslitum sænsku bikarkeppninnar í handknattleik. Síðari leikurinn verður í Partille á morgun.
- Tumi Steinn Rúnarsson er enn frá keppni vegna erfiðra meiðsla og var þar af leiðandi ekki með Coburg í gær þegar það sótti TuS N-Lübbecke heim í annarri umferð þýsku 2. deildarinnar. Coburg tapaði með eins marks mun, 27:26. Tumi Steinn meiddist í æfingaferð Coburg fyrir nokkrum vikum.
- Blaz Blagotinsek hefur kvatt ungverska liðið Veszprém og samið við Göppingen í Þýskalandi til eins árs. Hleypur hann í skarðið fyrir línumanninn Vid Poteko sem verður lengi frá vegna meiðsla. Nokkuð er síðan að Blagotinsek samdi við Flensburg um að koma til liðs við félagið sumarið 2023 og staldrar þar með aðeins við í eitt ár í suðurhluta Þýskalands.
- Hinn sigursæli þjálfari franska kvennalandsliðsins í handknattleik, Olivier Krumbholz, hefur ákveðið að hætta eftir Ólympíuleikana á heimavelli árið 2024 og draga sig út úr þjálfun. Hann verður þá 66 ára gamall.
- Krumbholz hefur þjálfað franska kvennalandsliðið frá 1998 að undanskildum árunum 2013 til 2016. Áður en Krumbholz tók við þjálfun A-landsliðs kvenna var hann við stjórnvölin hjá ungmennalandsliði Frakka frá 1992 til 1998 og var þar áður þjálfari kvennaliðs Metz frá 1986 til 1995. Undir stjórn Krumbholz hefur franska landsliðið unnið öll stórmótin þrjú að minnsta kosti einu sinni.
- Auglýsing -
