Molakaffi: Orri, Óskar, Viktor, Sandra, Elías, Birta, Katrín, Halldór, Ágúst, Felix, Arnar, Bjartur

Orri Freyr Þorkelsson gekk til liðs við Elverum í sumar. Mynd/Samsett frá Elverum
  • Orri Freyr Þorkelsson skoraði tvisvar þegar Elverum vann Fjellhammer, 30:24, í norsku úrvalsdeildinni í gær. Sem fyrr eru Noregsmeistarar Elverum efstir í deildinni. Þeir hafa 18 stig eftir níu leiki.
  • Ekki gekk jafnvel hjá Óskari Ólafssyni og Viktori Petersen Norberg og liðsmönnum Drammen í gær. Þeir töpuðu á útivelli fyrir Halden, 34:30. Drammen situr í fjórða sæti úrvalsdeildarinnar með 12 stig að loknum níu leikjum. Óskar og Viktor skoruðu tvö mörk hvor í leiknum.
  • Sandra Erlingsdóttir og félagar hennar í EH Aalborg unnu stórsigur á Lyngby á útivelli, 32:24, í dönsku 1. deildinni í gær. Sandra skoraði eitt mark og var einu sinni vísað af leikvelli. EH Aalborg er í fimmta sæti deildarinnar með átta stig eftir sjö leiki. Fjögur lið eru jöfn fyrir ofan með 12 stig hvert.
  • Elías Már Halldórsson, þjálfari Fredrikstad Bkl. og leikmenn hans, fögnuðu kærkomnum sigri í norsku úrvalsdeildinni í handknattleik kvenna í dag er liðið lagði Oppsal, 29:23, á útivelli. Birta Rún Grétarsdóttir var í liði Oppsal sem skoraði ekki mark. Fredrikstad Bkl. er í sjöunda sæti deildarinnar með átta stig að loknum níu leikjum. Oppsal er í 10. sæti með sex stig. Fjórtán lið eiga sæti í deildinni.
  • Katrín Tinna Jensdóttir var að vanda í liði Volda sem vann Haslum Bærum, 26:19, á heimavelli í norsku 1. deildinni í gær. Hún skoraði ekki en var föst fyrir í vörninni var m.a. einu sinni vísað af leikvelli. Halldór Stefán Haraldsson og Hilmar Guðlaugsson eru þjálfarar Volda sem er í öðru sæti deildarinnar með níu stig eftir sex leiki, þremur stigum á eftir Söru Dögg Hjaltadóttur og félögum í Gjerpen sem hafa leikið einum leik fleira.
  • Ágúst Ingi Óskarsson skoraði fimm mörk og Felix Már Kjartansson eitt þegar lið þeirra Neistin vann Kyndil, 26:22, í Höllini á Hálsi í Þórshöfn á föstudagskvöld í færeysku úrvalsdeildinni. Arnar Gunnarsson er sem fyrr þjálfari Neistans sem nú er í fimmta sæti með sex stig að loknum sjö leikjum.
  • Bjartur Már Guðmundsson skoraði ekki fyrir StÍF þegar liðið tapaði naumlega fyrir Kyndli, 31:30, á sunnudaginn í færeysku úrvalsdeildinni. StÍF er í sjötta sæti deildarinnar með fimm stig þegar sjö leikir eru að baki.
- Auglýsing -

Nýjustu fréttir

- Auglýsing -