Molakaffi: Pastor áfram, Sostaric, frá Úkraínu til Póllands, breytingar, Jacobsen, Cehte

Juan Carlos Pastor, þjálfari ungversku meistaranna, Pick Szeged. Mynd/EPA
  • Juan Carlos Pastor þjálfari ungverska meistaraliðsins Pick Szeged og Marko Krivokapic aðstoðarmaður hans hafa skrifað undir nýjan samning við félagið sem gildir til loka leiktíðarinnar vorið 2024. Pastor sem var landsliðsþjálfari Spánar frá 2004 til 2008 hefur þjálfað Pick Szeged frá 2013 þegar hann hætti eftir að hafa þjálfað Valladolid í heimalandi sínu frá 1995. Pick Szeged hefur unnið ungverska meistaratitilinn tvö síðustu tímabil.
  • Ungverska meistaraliðið sagði ennfremur frá því í gær að hornamaðurinn Mario Sostaric hafi framlengt samning sinn við félagið til ársins 2025. Austurríkismaðurinn Sebastian Frimmel hefur einnig framlengt samning sinn við ungversku meistarana til 2025.

     
  • Tvö lið frá Úkraínu taka þátt í úrvalsdeild kvenna í Póllandi á komandi leiktíð. Um er að ræða meistaraliðið Galychanka Lviv og KPR Ruch Chorzow. Fyrrnefnda liðið er ríkjandi meistari í handknattleik kvenna í Úkraínu og komst í undanúrslit í Evrópubikarkeppni kvenna í vor. 
  • Breytt fyrirkomulag verður tekið upp í úrvalsdeild kvenna í Póllandi á næsta keppnistímabili. Eftir að leikin hefur verið einföld umferð, þ.e. allir við alla einu sinni, verður deildinni skipt upp í tvo jafna hluta. Breytingarnar eru svipaðar þeim sem HK lagði fram á ársþingi HSÍ í vor um keppni í einni úrvalsdeild kvenna í Olísdeildinni

  • Danska úrvalsdeildarliðið Esbjerg sem lék til úrslita í Meistaradeild Evrópu í kvennaflokki í vor, hefur samið við Julie Bøe Jacobsen. Hún er leikstjórnandi og kemur frá Byåsen í Þrándheimili. Jacobsen á að hlaupa í skarðið fyrir Estavana Polman. Sagt var frá komu Jacobsen til Esbjerg í morgunsárið. 
  • Nejc Cehte hefur samið við danska meistaraliðið GOG til eins árs. Cehte, sem er landsliðsmaður Slóveníu, hefur síðustu fjögur ár leikið með HannoverBurgdorf. Hann ætlaði til Vardar Skopje en skipti um skoðun eftir að félagið varð að draga saman seglin og var neitað um þátttökurétt í Meistaradeild Evrópu vegna ógreiddra skulda.

- Auglýsing -

Nýjustu fréttir

- Auglýsing -