Molakaffi: Polman meidd, veiruvandi í Svíþjóð, Bjarni Ófeigur, Frandsen, Vipers, Malashenko

Estavana Polman er meidd á ný en þó ekki með slitið krossband eins og i byrjun leiktíðar. Mynd/EPA
  • Estavana Polman, ein fremsta handknattleikskona heims og fyrirliði hollenska landsliðsins þegar það varð heimsmeistari fyrir hálfu öðru ári, leikur ekki meira með Esbjerg á tímabilinu. Hún meiddist á hné í kappleik á fimmtudaginn. Polman sleit krossband í hné í ágúst og var nýlega byrjuð að leika á nýjan leik þegar hún meiddist. Þó er huggun harmi gegn að krossbandið er í lagi en meiðslin nú eru á því hné þar sem krossbandið gaf sig.
  • Þriðja úrslitaleik Skuru og H65 um sænska meistaratitilinn í handknattleik kvenna sem fram átti að fara í gær var frestað vegna þess að kórónuveiran greindist meðal leikmanna beggja liða á laugardaginn. Skuru vann tvo fyrstu leiki liðanna og þarf aðeins einn vinning til viðbótar. Óvíst er hvenær þriðji leikurinn fer fram en vonir standa til að það geti orðið undir lok vikunnar.
  • Bjarni Ófeigur Valdimarsson og samherjar í Skövde standa höllum fæti í úrslitarimmunni við Sävehof um sænska meistaratitilinn í handknattleik karla. Þeir eru án vinnings eftir tvo leiki og þarf Sävehof einn vinning til viðbótar til að verða meistari. Þriðja viðureign liðanna verður í Partille annað kvöld.
  • Danski handknattleiksmarkvörðurinn Sebastian Frandsen er sagður hafa samið við Porto eftir því sem TV2 í Danmörku greinir frá. Frandsen leikur nú með Holstebro sem komið er í undanúrslit um danska meistaratitilinn.
  • Vipers Kristiansand varð á laugardaginn norskur bikarmeistari í handknattleik kvenna eftir stórsigur á Sola, 29:16, í úrslitaleik. Eins og handbolti.is greindi frá fyrir helgina varð Vipers Kristiansand norskur meistari um miðja síðustu viku eftir öruggan sigur á Storhamar.
  • Elizaveta Malashenko, ein fremsta handknattleikskona Rússlands, sleit krossband fyrir helgina og verður þarf leiðandi ekki í rússneska landsliðinu á Ólympíuleikunum í sumar. Rússar eiga titil að verja á leikunum.
- Auglýsing -

Nýjustu fréttir

- Auglýsing -