- Auglýsing -
- Pólska meistaraliðið Lomza Vive Kielce sem Haukur Þrastarson og Sigvaldi Björn Guðjónsson leika með hefur samið við frönsku landsliðsmennina Nedim Remili og Benoît Kounkoud. Þeir koma til Kielce eftir ár. Báðir eru nú í herbúðum Paris SG. Samningur þeirra við Kielce er til fjögurra ára eða fram á mitt ár 2026.
- Raúl Entrerrios hefur ákveðið að leggja keppnisskóna á hilluna nú við lok leiktíðar eftir afar sigursælan feril með Barcelona og spænska landsliðinu. Entrerrios, sem hélt upp á fertugsafmælið í febrúar, varð Evrópumeistari með Barcelona á sunnudaginn.
- Gonzalo Perez de Vargas markvörður Barcelona var valinn mikilvægasti leikmaður úrslitahelgar Meistaradeildarinnar. Hann er annar markvörðurinn sem hreppir nafnbótina. Sá fyrsti var Arpad Sterbik, markvörður Vardar, árið 2017 þegar liðið vann PSG í úrslitaleik Meistaradeildar.
- Valero Rivera, vinstri hornamaður Nantes og fyrrverandi leikmaður Barcelona, varð markahæsti leikmaður Meistaradeildarinnar með 95 mörk. Dika Mem hjá Barcelona var næstur á eftir með 93 mörk.
- Handknattleiksmarkvörðurinn Jose Javier Hombrados sem var um langt árabil aðlamarkvörður spænska landsliðsins hefur ákveðið að hætta við lok leiktíðar. Hombrados er 49 ára gamall og hefur síðustu sex ár leikið BM Guadalajara. Liðið er fallið úr deildinni og leikur sinn síðasta leik á miðvikudaginn. Það verður um leik síðasti leikur Hombrados á löngu um glæstum ferli. Hann á að baki 260 landsleiki fyrir Spán og var m.a. í sigurliði Spánverja á HM 2005. Einnig á hann fimm gullverðlaun úr Meistaradeild Evrópu. Hombrados lék með Atlético Madrid, TEKA Santander, Ademar Leon, Portland San Antonio, Ciudad Real, Wetzlar auk BM Guadalajara sem áður er getið.
- Auglýsing -
